Në Kuvend është zhvilluar një seancë plenare ku mazhoranca ka rrëzuar disa kërkesa të opozitës për interpelancë me kryeministrin Edi Rama.
Gazetari Mariglen Kume në një lidhje me studion e lajmeve në MCN TV bëri një përmbledhje lidhur me zhvillimet kryesore ku bëri me dije se me votat e shumicës parlamentare u hodh poshtë kërkesa e disa deputetëve demokratë për interpelancë lidhur me çështjen e abuzimeve me tenderët e AKSHI-t.
Kryetari i Kuvendit, Niko Peleshi, argumentoi se çështja është nën hetim dhe një interpelancë do të përbënte ndërhyrje në punën e drejtësisë. Ndërkohë, opozita akuzoi mazhorancën se po shmang llogaridhënien e kryeministrit në Kuvend.
Po ashtu Kume tha se u rrëzuan edhe kërkesa të tjera të opozitës, përfshirë interpelancën për situatën energjetike dhe rezervat e naftës në vend, si dhe ajo për çështjen e “Jet Bank”, për të cilën qeveria delegoi përgjigjen tek ministrja për Marrëdhëniet me Parlamentin, Eriona Ismaili.
Opozita ngriti dyshime për licencimin e bankës dhe burimin e kapitalit, ndërsa mazhoranca sqaroi se procesi i licencimit është kompetencë e Bankës së Shqipërisë.
U rrëzua gjithashtu edhe kërkesa për ndryshimin e rendit të ditës, që synonte diskutimin mbi raportin e Parlamentit Europian për Shqipërinë.
Seanca është futur në rendin e ditës dhe po vijon normalisht. Mazhoranca ka rrëzuar çdo kërkesë për interpelancë të opozitës me kryeministrin.
Duke komentuar zhvillimet, Kume shtoi se rrëzimi i kërkesave tregon vijimësinë e përplasjes politike në Kuvend dhe mungesën e konsensusit për çështje të rëndësishme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
