Djegien e mandateve anëtari i këshillit kombëtar të PD Enno Bozdo e ka cilësuar djegien e mandateve një vendim shumë të gabuar të opozitës që ka lënë pasoja të cilat sipas tij po i shohim edhe sot.
I ftuar në emisionin “Arnautistan” në MCN TV Bozdo tha se djegia e mandateve është kërkuar nga demokratët për tu bindur se nuk kishte marrëveshje mes Ramës dhe Bashës dhe pas këtij vendimi siç u shpreh ai helmi i marrëveshjes së 17 majit ka qenë më i fortë se ky gjest. Ai gjithashtu tha se opozita duhet të kërkojë falje për atë vendim.
“Unë kam qenë pro djegies së mandateve. Pas zgjedhjeve të 2017-ës hija e dyshimit për marrëveshjen mes Ramës dhe Bashës ishte e madhe. Kudo ku shkoja më thuhej që keni marrëveshje me Ramën, nëse jo digjni mandatet. Mesa duket helmi i marrëveshjes së 17 majit ka qenë më i fortë se ky gjest i joni. Kjo çoi edhe në mos futjen e zgjedhjeve që ishte gabim i madh. Edhe pse nuk kam qenë thelbësor në këtë gjë, unë kam heshtur. Por Bashës i kam thënë mendimin tim. Por djegia e mandateve ishte vendimi i gabuar dhe ne kërkojmë falje të madhe. Ishte vendim i fortë dhe thikë me dy presa, rezultati i së cilës është ky që shohim sot. Për përgjegjësinë time kërkoj ndjesë”, tha demokrati.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
