Sot, më 18 dhjetor është Dita Kombëtare e Diasporës në Shqipëri.
Në kuadër të kësaj dite u zhvillua mbledhja e parë e Këshillit Koordinues të Diasporës, i cili është i përbërë nga përfaqësues të komuniteteve shqiptare jashtë vendit.
Të pranishëm ishin anëtarët e Këshillit Koordinues, kryeministri Edi Rama, presidenti Ilir Meta, ministri i Brendshëm Sandër Lleshi, ministrja e Arsimit Besa Shahini, Ministrja e Kulturës Elva Margariti, Kryetari i Akademisë së Shkencave Skënder Gjinushi, ish-ministrja e Mbrojtjes Mimi Kodheli etj.
Mbledhja u hap nga Ministri i Shtetit për Diasporën, z. Pandeli Majko, i cili në fjalën e tij, falënderoi anëtarët e Këshillit për kontributin e deritanishëm.
Majko theksoi se Këshilli Koordinues i Diasporës është një strukturë e re, e cila funksionon për herë të parë në historinë e shtetit shqiptar dhe synon mbrojtjen dhe forcimin e marrëdhënieve me Diasporën shqiptare.
“Diaspora shqiptare jep një kontribut me rëndësi në zhvillimin e vendit të origjinës në të gjitha fushat, përfshirë arsimin, kulturën dhe ekonominë”, u shpreh ai.
Mbledhja u drejtua nga anëtari i Këshillit, z. Mark Gjonaj, përfaqësues i komunitetit shqiptar në SHBA, i cili u ndal tek rëndësia e Diasporës shqiptare në fusha të ndryshme të vendit dhe angazhimin që duhet të kenë anëtarët e këtij Këshilli në forcimin e marrëdhënieve të Diasporës me institucionet shtetërore shqiptare.
Takimi vijoi me përshëndetjet e Presidentit të Republikës së Shqipërisë, z. Ilir Meta dhe Kryeministri i Shqipërisë, z. Edi Rama, të cilët theksuan rolin e Diasporës si thesar i çmuar i Shqipërisë dhe solidaritetin dhe kontributin e saj me familjet e prekura nga tërmeti.
I pranishëm në takim ishte edhe Drejtuesi i Operacionit të Emergjencës rreth situatës së pas tërmetit, z. Bledi Çuçi, i cili bëri një përmbledhje të shkurtër të menaxhimit të situatës pas tërmetit në Shqipëri, përfshirë shpëtimin, trajtimin shëndetësor, strehimin e qytetarëve dhe vlerësimin e dëmeve.
Anëtarët e Këshillit miratuan Rregullorja e Këshillit, e cila parashikon edhe zgjedhjen e drejtuesve të tij.
Anëtarët zgjodhën si kryetar z. Mark Gjonaj, nënkryetare znj. Anila Hyka Smorgrav si dhe sekretare znj. Adriana Fishta-Bejko.
Kryetari, z. Gjonaj është përfaqësues i Diasporës shqiptare në SHBA dhe mban postin e këshilltarit në Këshillin e Bashkisë së Nju-Jorkut. Nënkryetarja, Znj. Smorgrav, profesioniste në fushën e IT-së dhe telekomit, përfaqëson Diasporën shqiptare në Francë. Ndërkohë sekretarja e Këshillit, znj. Fishta-Bejko është mësimdhënëse, autore dhe studiuese shkencore në Kanada.
Anëtarët e Këshillit Koordinues të Diasporës janë:
Mark Gjonaj - SHBA
Visar Tasimi - SHBA
Esmeralda Mosko - SHBA
Adriana Fishta-Bejko Bejko - Kanada
Ardian Radovicka - Kanada
Lazim Destani - Gjermani
Sokrat Sinaj - Zvicër
Ardian Lekaj - Holandë
Rosario Peta - Itali
Anila Smorgrav - Francë
Gazment Kapllani - Greqi
Namik Shabi - Turqi
Bashkim Bekiri - Australi
Brikena Muharremi - Britani e Madhe
Endri Hatillari - Britani e Madhe
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
