Pandemia/ Meta: Nuk ka më kohë, të shtohet masivisht numri i testimeve

Presidenti i vendit Ilir Meta i ka bërë thirrje qeverisë të shtojë numrin e testimeve në kuadër të parandalimit dhe përhapjes së Covid-19.

Sipas tij testimi është e vetmja mënyrë për të mbajtur në kontroll pandeminë dhe për të organizuar në mënyrë më efikase sistemin shëndetësor.

Meta vë theksin tek testimi i mjekëve, infermierëve, arsimtarëve dhe të moshuarve për të cilët duhet të ketë një testim të menjëhershëm.

“Në këtë moment kritik të përhapjes së pandemisë, është jetike të shtohet masivisht numri i testimeve. Testimi është mjeti tepër efikas për diagnostifikimin, gjurmimin dhe trajtimin në kohë të qytetarëve të prekur nga COVID-19. Testimi është mundësia e vetme për të vendosur kontrollin mbi situatën dhe për të organizuar përgjigjen e sistemit shëndetësor për çdo qytetar të prekur nga COVID-19”, shkruan Meta.

Më tej ai rendit disa hapa. “1.Të gjithë mjekët, infermierët dhe personeli mbështetës në sistemin e shëndetësor, parësor dhe spitalor, të cilët janë në vijën e parë të përballjes me COVID-19.

2.Të gjithë arsimtarët, në çdo nivel, për shkak se testimi dhe gjurmimi pasues i rasteve të tyre lidhet drejtpërdrejt me shëndetin e fëmijëve tanë.

3.Të gjithë të moshuarit e vetmuar, të cilët jetojnë të shtëpitë e kujdesit social.

4.Të gjithë qytetarët me sëmundje bashkëshoqëruese”.

Sipas Metës, për të gjitha këto kategori është tepër e nevojshme, sipas rekomandimeve të OBSH-së dhe organizatave të tjera, të nisë menjëherë edhe vaksinimi me vaksinën e gripit stinor.

“Për këtë qëllim të miratohet pa vonesë edhe një plan urgjent, transparent dhe i monitorueshëm në çdo moment.

Pandemia mund të vihet nën kontroll dhe jetët e qytetarëve mund të shpëtohen. Çdo ç’organizim, mosfinancim dhe mosveprim sjell pasoja fatale përditë. Shkenca ka folur. Koha për të vepruar nuk pret më”, përfundoi Meta.