Parlamenti mblidhet sot në një seancë jashtë radhe për të miratuar dekretimin e ministrave të rinj. Kreu i shtetit ka dekretuar pak ditë më parë, në distancë kohore nga njëri-tjetri, të gjithë emrat e propozuar nga Rama për ministra të rinj të kabinetit të tij. Por mbetet ende pezull posti i ministrit të Jashtëm. Presidenti Meta nuk ka dekretuar ende shkarkimin e Ditmir Bushatit dhe kalimin e kompetencave të tij kryeministrit Rama.
Mësohet se në seancën e parashikuar për në orën 17:00 do të marrin pjesë edhe deputetët e opozitës. Partia Demokratike do të mbledhë grupin parlamentar një orë para nisjes së seancës, për të diskutuar rreth strategjisë që do të ndjekin demokratët.
Ndërkohë, paraditen e sotme, kreu i grupit parlamentar të PS-së, Taulant Balla, ka folur për dekretimet e ministrave të rinj nga presidenti Ilir Meta. Duke folur nga Elbasani, Balla u shpreh se sot duhet të marrë fund ngërçi i dekreteve.
"Shpresoj që Meta të ketë përgjigje brenda orës 17:00, Presidenti të bazohet në Kushtetutë, nuk mund të sillet si kreu alternativ i opozitës. Ministrat e rinj janë profesionistë të punës. PS nuk ka komplekse politike".
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
