Lushnja e cila mbeti pa kryebashkiak 8 muaj më parë, sot do t’i drejtohet kutive të votimit për të zgjedhur kryetarin e ri.
Më 6 korrik të viti që shkoi, SPAK i vuri prangat Fatos Tushes, kryetarit socialist i cili drejtoi bashkinë e 7 më të madhe në vend për 10 vite , nga 2011-ta deri në 2021-shin, kur u arrestua për korrupsion dhe shpërdorim detyre.
Kaq mjaftoi që vetëm një ditë më pas, më 7 korrik, kryeministri Edi Rama ta shkarkonte nga detyra, e madje ta përjashtonte edhe nga partia, duke i kujtuar se përgjegjësia është personale.
Arrestimi i Tushes, bëri që Lushnja të ishte bashkia e 6 në vend pa kryetar, drejtimin e së cilës e mori nënkryetarja Eriselda Sefa.
Ndonëse për një mandat të shkurtër, vetëm 1 vit, deri në 2023-shin, kur do të mbahen zgjedhjet e përgjithshme lokale, qytetarët lushnjarë do të zgjedhin mes 3 kandidaturave.
Socialistët i besuan kryetares te komanduar, Eriselda Sefës, e angazhuar që prej vitit 2006 në qeverisjen vendore, Shefe e kabinetit të Fatos Tushes, e më pas nënkryetare e Bashkisë. Me një profil jo vetëm institucional, por edhe politik, Sefa synon të jetë gruaja e parë që e drejton këtë bashki.
Por përballë, si kurrë më parë, socialistët do të kenë jo një, por dy demokratë, si rezultat i përçarjes së partisë demokratike në dy kampe, në të Bashës e të Berishës.
Lulzim Basha synon tua rikthejë Lushnjen demokratëve me Indrit Sefën, pas një rekordi prej 3 mandatesh të Fatos Tushes dhe Partisë Socialiste, e cila e ka drejtuar qytetin për 15 vite që nga viti 1992.
Sefa me profesion avokat, u emërua vetëm dy muaj më parë si sekretar për çështjet ligjore në Partinë Demokratike, për t’ju besuar më pas një tjetër detyrë e rëndësishme, të fitojë Lushnjen socialiste, aty ku Edi Rama duket se angazhuar thuajse të gjithë kabinetin e tij qeveritar në mbështetje të Eriselda Sefës.
Që nga kreu i Grupit parlamentar, Taulant Balla, e deri tek ministret Balluku, Kushi, Manastirliu dhe Krifca, të cilat nuk e kanë lënë vetëm Sefën në këtë fushatë.
Por sfidën, kandidati i Bashës nuk do ta ketë vetëm me të besuarën e Taulant Ballës, por me një tjetër demokrat, Elton Banon e Berishës, I cili në këto zgjedhje do të garojë nën siglën e koalicionit “Shtëpia e Lirisë”.
Në betejën mes Bashës apo Berishës, Bano zgjodhi këtë të fundit..
Elton Bano nuk ishte përzgjedhje e rastësishme e ish-kryeministrit, pasi është djali i ish-deputetit të PD-së, Ilir Bano.
Në Lushnje beteja duket se do të jetë e fortë! Do t’ja besojnë lushnjarët edhe njëherë bashkinë socialistëve? Apo votat në këto zgjedhje do të shkojnë mes dy kandidatëve demokratë?
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
