Pas vendimit të marrë në mbledhjen e sotme të Kryesisë në Partinë Demokratike për shkarkimin e tij, Edi Paloka ka reaguar nëpërmjet një statusi në rrjetet sociale. Kryetari i Këshillit Kombëtar thotë se Kuvendi u mblodh me kërkesë të delegatëve të tij dhe mori disa vendime historike.
Paloka thekson se në Kuvendin e 11 dhjetorit ishin pjesë një numër jo i vogël i anëtarëve të Këshillit Kombëtar. Ai i bëri thirrje pjesës së anëtarëve që nuk iu bashkuan Kuvendit sot që t’i bashkohen PD-së për ta rithemeluar dhe të mos “bëhen pjesë e lojës të atyre që për karrige janë gati të shkelmojnë interesat e demokratëve”.
Postimi i plotë i Edi Palokës:
Sot Kuvendi i PD, për herë të parë u mblodh me kërkesë të delegatëve të tij dhe mori vendime historike, të rëndësishme në bazë të të cilëve qëndron rithemelimi i PD.
Në Kuvendin e demokratëve të lirë, sot morën pjesë një numër jo i vogël prej anëtarëve të Këshillit Kombëtar. Unë ju bëj thirrje dhe pjesës tjetër të anëtarëve, t’i bashkohen PD të rithemeluar sot me vullnetin e shumicës përfaqësuese të demokratëve e të mos bëhen pjesë e lojës të atyre që për karrige janë gati të shkelmojnë interesat e demokratëve, për më tepër, nga sot, pa asnjë tagër për të mbledhur Këshillin Kombëtar.
Këshilli Kombëtar, pas Kuvendit Kombëtar është organi më i lartë i PD dhe anëtarët e tij duhet të përfaqësojnë vullnetin dhe interesat e demokratëve, vullnet që u shpreh qartazi sot në Kuvendin për rithemelimin e PD.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
