Partia Demokratike dhe Lëvizja Socialiste për Integrim kanë reaguar pas komenteve të Taulant Ballës, lidhur me rekomandimet e Komisionit të Venecias.
Në një dalje për mediat nga selia e LSI, Petrit Vasili tha se Venecia ka folur qartë dhe pa ekuivok, qoftë në çështjen e Gjykatës Kushtetuese, qoftë në ligjin e antishpifjes.
Duke theksuar më tej se Venecia foli në favor të veprimeve të Presidentit, Vasili kujtoi se ishte pikërisht mazhoranca e cila thotë tashmë se vendimet i takojnë institucioneve shqiptare, ajo që iu drejtua Komisionit.
“Ishte vetë ‘Rilindja’ që e kërkoi Venecian, fshehu dhe informacionet që të mainuplonte një opinion evaziv e të dyshimtë. Venecia qe e qartë, pas ansjë ekuivok dhe e prerë”, tha Vasili.
Ndërkohë, Zv.kryetari i PD Edmond Spaho tha se kur Partia Socialiste mori pushtetin ishin vetëm 3 kushte për integrimin, ndërkohë që tashmë janë 15.
“Opinionet e fundit të Venecias provuan se 15 kushtet e integrimit nuk janë për Shqipërinë por të Edi Ramës. Censura dhe Gjykata Kushtetuese janë pjesë e 15 kushteteve. Është Gjykata Kushtetuese ajo që do të vendosë për zgjedhjet e ardhshme. Me vendimin e vet, Venecia faktoi synimin e Ramës për të kapur cdo organ të drejtësisë duke i grabitur Presidentit të drejtën kushtetuese”, tha Spaho.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
