Pas daljes së ministrit të Brendshëm, Fatmir Xhafajt i cili hodhi posht akuzat e opozitës për audio përgjimin, ka reaguar menjëherë Partia Demokratike.
Ka qenë deputeti Ekelejd Alibeaj, i cili u shpreh se Xhafaj ka kërcënuar kryeministrin Edi Rama, se do të rrëzojë qeverinë. Alibeaj gjeti edhe një ngjashmëri mes ish-ministrit të Brendshëm, Saimir Tahirit edhe atij aktualit, dhe është ajo e kërcënimit të Ramës.
"Fatmir Xhafaj ndoshta nuk ka një dosje aq të pasur sa të Saimir Tahirit për Edi Ramën, por ai njësoj si Tahiri, paralajmëroi Ramën se largimi i tij do ta thotë rënie e qeverisë! Për të bërë këtë kërcënim për Ramën, Ministri i Brendshëm akuzoi opozitën se po bashkëpunon me djallin për të rrëzuar qeverinë!', tha Alibeaj.
Në një dalje për mediat nga selia blu, deputeti i PD-së e ka quajtur si kriminale deklaratën e sotme të Xhafajt se opozita vepron për llogari të interesave kriminale. Ndërsa ka shtuar se Xhafaj gënjeu kur tha se atë nuk e prek ligji Antimafia.
"Është gënjeshtër dhe mashtrim përgjigja e tij se nuk është subjekt i ligjit Antimafia!
Është gënjeshtër dhe mashtrim se ai nuk i pengon hetimet për vëllain trafikant droge nga detyra e Ministrit të Brendshëm!
Është kriminale akuza e Fatmir Xhafajt se opozita vepron për llogari të interesave kriminale!", tha më tej Alibeaj.
Opozita sipas deputetit demokrat, është i vetmi autoritet në këtë vend që ka denoncuar lidhjet e qeverisë Rama me krimin dhe thotë beteja jonë do të vazhdojë me të njëjtën forcë!
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
