Legjitimimi i "11 dhjetorit" nga gjykata, Berisha mbërrin në selinë blu

Ish-kryeministri Sali Berisha ka hyrë sot rreth orës 15:00 në selinë blu, ku më herët u fut një përfaqësi e Komisionit për Rithemelimin e PD. 

I pyetur nëse do t'i bashkohet mbledhjes me përfaqësuesit e dy palëve, Berisha tha: "E jona, s’ka!”.

Mësohet se në selinë e PD po zhvillohet një mbledhje, ku janë të pranishëm Komisioni i Rithemelimit, kryetari i komanduar Enkelejd Alibeaj dhe Sekretari i Përgjithshëm Gazment Bardhi. 

(14:40) Pas vendimit të gjykatës Komisioni i Rithemelimit të PD hyn në selinë blu 

Pas vendimit të marrë nga gjykata që njohu vendimet e Kuvendit të Sali Berishës më 11 dhjetor, një përfaqësi e Komisionit të Rithemelimit të PD hyri sot brenda selisë blu.

Në selinë e PD kanë mbërritur Flamur Noka, Belind Këlliçi, Edmond Spaho, Albana Vokshi dhe Grigels Muçollari. 

Grupi i deputetëve ka shkuar në katin e dytë të godinës së PD-së, ku pritet të zhvillojnë mbledhje në një nga sallat.

Pritet që ata të kenë një takim me kryetarin e komanduar të PD-së, Enkelejd Alibeaj, dhe më pas do të bëjnë një deklaratë për mediat.