Kryeministrja italiane Xhorxha Meloni do të vijë në Shqipëri më 5 qershor, në një vizitë zyrtare, gjatë javës së kulturës italiane.
Mediet italiane shkruajnë se shefja e ekzekutivit është shumë aktive ditët e fundit përpara zgjedhjeve parlamentare evropiane më 8 dhe 9 qershor, ndërsa vizita në Shqipëri bëhet në këtë kuadër, për të promovuar marrëveshjen me Tiranën për emigrantët e paligjshëm.
Krahas takimit me homologun Edi Rama, Meloni do të shkojë gjithashtu për të ndjekur nga afër punimet e kampeve në Shëngjin dhe Gjadër të Lezhës.
Kryeministrja kishte planifikuar një udhëtim për më 20 maj, kur do të bëhej çelja e qendrave të emigrantëve. Më pas, shty e shty, erdhëm te kjo e mërkurë, vetëm 3 ditë para hapjes së qendrave të votimit për zgjedhjet evropiane.
Ndërkohë, një lajm nga përtej oqeanit, Amerika, i zyrtarit të lartë të sigurisë Alehandro Majorka se disa emigrantë në kufi me Meksikën do të shkojnë në Greqi dhe Itali për t’i përpunuar të dhënat ka ndezur skenën e brendshme politike në Romë. Për deputetin Anxhelo Bonel inga “Green Europe”, Italia është Shqipëria e Amerikës.
Lajmi i publikuar nga rrjeti amerikan “CBS”, sipas të cilit Italia ka shprehur gatishmërinë e saj për të mirëpritur emigrantët nga disa vende të Amerikës së Jugut që shkojnë drejt Shteteve të Bashkuara, e shndërron Italinë në Shqipërinë e SHBA-së, duke çelur rrugën e një tregu për shit-blerjen e emigrantëve.
Debati për emigracionin e paligjshëm është një ndër temat e nxehta në politikën italiane dhe në vende të tjera të Evropës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
