Në Kosovë, sot është afati i fundit i partive politike për të dorëzuar listat e tyre me emrat e kandidatëve për deputetë, për zgjedhjet e jashtëzakonshme të 14 shkurtit.
Deri më tani vetëm dhjetë subjekte politike me gjithsej 210 kandidatë, kryesisht nga radhët e komuniteteve, kanë dorëzuar në KQZ aplikimin për certifikim për pjesëmarrje në zgjedhje, ku krahas tyre kanë dorëzuar dhe listën me emrat e kandidatëve për deputetë.
KQZ-ja ka bërë të ditur se do t’i dërgojë listat me emrat e të gjithë kandidatëve në Këshillin Gjyqësor të Kosovës. Ndërkohë, mësohet se listat me emrat e kandidatëve për deputetë do t’iu dërgohen edhe në pesë institucione tjera përveç KGjK-së, në Ministri të Punëve të Brendshme, në Ministri të Punëve të Jashtme, në Ministri të Mbrojtjes, në Agjencinë e Kosovës për Inteligjencë dhe në Panelin Zgjedhor për Ankesa dhe Parashtresa.
Sipas zëdhënësit të KQZ-së, Valmir Elezi listat me emrat e kandidatëve për deputetë do t’iu dërgohen këtyre institucioneve deri më 18 janar, ndërsa përgjigja do të kthehet më 20 janar. Sakaq, mësohet se më 3 shkurt do të nisë fushata zgjedhore per partitë politike.
Ndërsa afati për aplikim është i hapur deri sot në ora 18:00.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
