Presidenti i Republikës, Bajram Begaj, mori pjesë në ceremoninë e 70-vjetorit të shugurimit meshtarak të Ernest Simonit, të mbajtur në Katedralen Santa Maria del Fiore.
Kreu i shtetit e vlerësoi figurën e kardinalit si simbol të rrallë të qëndresës, besimit dhe sakrificës, duke e cilësuar një “martir të gjallë” dhe një dëshmi që tejkalon përmasat personale për t’u kthyer në simbol kolektiv kundër persekutimit.
Begaj theksoi se historia e Simonit dëshmon se besimi dhe dinjiteti njerëzor nuk mund të shuhen nga asnjë regjim, ndërsa kujtoi vuajtjet e klerikëve gjatë diktaturës komuniste dhe sakrificën e martirëve katolikë.
Sipas tij, kjo trashëgimi ka ndihmuar që sot Shqipëria të jetë model i harmonisë ndërfetare, një vlerë që duhet ruajtur dhe kultivuar çdo ditë.
Presidenti nënvizoi se liria e besimit është fryt i sakrificave konkrete dhe shprehu mirënjohje për Papa Françesku për vlerësimin e Simonit, duke e renditur atë në të njëjtën traditë frymëzuese me Nënë Tereza.
Në përfundim, ai e cilësoi kardinalin një pasuri të çmuar kombëtare dhe model frymëzimi për brezat.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
