Nga Shkodra, kreu i Partisë Demokratike akuzoi sot kryeministrin Edi Rama se po i kthen burgimet politike, duke ju referuar ndalimeve të protestuesve të Unazës së Re, mes tyre edhe ish-deputeti Klevis Balliu të cilit sot pasdite iu komunikua arresti në flagrancë.
Basha tha se në Shqipëri nuk do të kthehet kurrë më koha kur policia e shtetit që paguhet nga taksat e qytetarëve të dhunojë qytetarët.
“Sot Shqipëria gjendet në një udhëkryq ku përsëri ata që paguhen me taksat e shqiptarëve për të mbrojtur qytetarët nga antiligji kanë dhunuar qytetarët në mes të Tiranës dhe mbajnë sot në qelitë e burgut të burgosur politik të cilët janë ngritur për të mbrojtur qytetarët nga dhuna kriminale e bandës policore. Sot në mesditë njerëz të veshur me uniformën e policisë së shtetit kanë dhunuar qytetarë që mbrojnë shtëpitë e tyre kur njerëzit tanë, përfaqësues të PD, ish-deputet si Klevis Balliu dhe të tjera figura politike u ngritën për të bërë të vetmen detyrë që kemi, të qëndrojmë në krah të njerëzve siç po qëndrojmë dhe do të qëndrojmë deri në fitore.
Kanë urdhëruar arrestimin e tyre. Sot është dita kur Edi Rama do të kthejë të burgosurit politik në Shqipëri, sot është dita kur Edi Rama zyrtarisht po përdor policinë e shtetit për të dhunuar ligjin dhe qytetarët që janë në krah të ligjit. Ndaj sot është dita dhe ky është vendi për t’ia thënë qartë dhe prerë: I ke orët e numëruara! “, tha Basha.
Këto deklarata, Basha i bëri në aktivitetin e degës së PD në Shkodër, ku njoftoi anëtarësimin e 200 të rinjëve në PD.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
