Kuvendi i Shqipërisë mblidhet sot në seancën e radhës plenare, ku në qendër të diskutimeve pritet të jenë interpelancat me anëtarë të qeverisë, si dhe shqyrtimi i kërkesave të opozitës për ngritjen e komisioneve hetimore.
Sipas rendit të ditës, seanca do të nisë me procedurat standarde, përfshirë miratimin e procesverbalit të seancës së kaluar dhe njoftimet parlamentare.
Më pas, deputeti Erion Braçe ka kërkuar interpelancë me ministrin e Bujqësisë dhe Zhvillimit Rural, Andis Salla, lidhur me çështje që prekin sektorin bujqësor dhe politikat mbështetëse.
Në vijim, do të zhvillohet një seancë pyetje–përgjigje me ministren e Arsimit, Mirela Kumbaro, e kërkuar nga deputetja Erisa Xhixho, ku pritet të diskutohen problematika që lidhen me sistemin arsimor.
Një tjetër pikë e rëndësishme e rendit të ditës është shqyrtimi i dy projektvendimeve për ngritjen e komisioneve hetimore parlamentare, të propozuara nga opozita. Komisioni i parë lidhet me kontrollin e ligjshmërisë së veprimeve të Autoritetit Rrugor Shqiptar në realizimin e investimeve në infrastrukturën rrugore.
Ndërsa komisioni i dytë synon të hetojë funksionimin e Agjencisë Kombëtare të Shoqërisë së Informacionit (AKSHI), me fokus në sigurinë kibernetike, mbrojtjen e të dhënave personale dhe rreziqet për sigurinë kombëtare, në kuadër edhe të detyrimeve të Shqipërisë si vend anëtar i NATO-s.
Në rendin e ditës përfshihen gjithashtu shqyrtimi i projektligjeve që lidhen me portet turistike dhe parandalimin e pastrimit të parave, si dhe një projektvendim për zgjedhjen e një anëtari të Këshillit Mbikëqyrës të Bankës së Shqipërisë.
Seanca pritet të shoqërohet me debate politike, veçanërisht për çështjet e hetimit parlamentar dhe transparencës institucionale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
