Presidenti Meta: Zbatimi i ligjit të arsimit të lartë, me shumë probleme

Presidenti i Republikës Ilir Meta, ka folur sot për herë të parë publikisht për zbatimin e ligjit të arsimit të lartë.

Meta në përkrahje të studentëve e tha hapur se protestat e drejta të studentëve treguan se zbatimi i ligjit aktual të Arsimit të Lartë ka probleme: “Protestat e drejta të studentëve gjatë dhjetorit të kaluar treguan se zbatimi i ligjit aktual të Arsimit të Lartë ka probleme dhe vështirësi për të siguruar autonominë dhe pavarësinë financiare të universiteteve publike. Reforma në Arsimin e Lartë dhe kërkimi shkencor duhet të ketë një frymë më gjithëpërfshirëse. Reforma në Arsimin e Lartë duhet të synojë krijimin e kushteve të duhura për të përmirësuar cilësinë e mësimdhënies  dhe të synojë që universitetet të jenë të pavarur dhe të pakushtëzuar nga politika”, u shpreh presidenti Meta.

Sipas Kreut të Shtetit, reforma në Arsimin e Lartë duhet të synojë krijimin e kushteve të duhura për të përmirësuar cilësinë e mësimdhënies.

Meta dha opinionin e tij edhe lidhur me vonesën e pajisjes së studentëve me Kartën e Studentit. Ai e quajti të pajustifikueshme një vonesë të tillë duke e konsideruar si një detyrim imediat, në mënyrë që t'u garantohen studentëve të drejtat që burojnë prej tij, ashtu si edhe të studentëve të tjerë nga vendet e rajonit dhe Evropës. 

Presidenti bëri thirrje që reforma në në Arsimin e Lartë të synojë që universitetet të jenë të pavarura dhe të pakushtëzuara nga politika në vend.