Mazhoranca dhe grupi i Alibeajt nga PD arritën dakordësinë për dy nismat ligjore që parashikojnë kalimin në sitë të politikanëve dhe figurave publike që kanë bashkëpunuar me ish sigurimin e shtetit. Socialistët kërkojnë verifikimin e të gjithë subjekteve pavarësisht nëse janë pajisur me certifikatën e pastërtisë nga komisionet Mezini dhe Bezhani. Ndërsa demokratët kërkojnë hapjen e plotë të dosjeve që i përkasin periudhës kohore nëntor 1944-korrik 1991.
Mirëpo këto dy nisma u kundërshtuan nga kreu i partisë Republikane Fatmir Mediu, i cili kërkoi të mos hapen dosjet për të përndjekurit politikë dhe deputeti Oerd Bylykbashi që kërkoi rikthimin e ligjit për lustracionin.
Teksa i cilësoi nismat antikushtetuese dhe për të goditur ish presidentin Ilir Meta, deputetja e partisë së Lirisë, Erisa Xhixho nuk ia kurseu akuzat autoritetit të dosjeve duke kërkuar shkarkimin e anëtarëve të tij.
Ndërkohë, javën e ardhshme socialistët do të depozitojnë në kuvend edhe ndryshimet në ligjin e dekriminalizimit ku do të ndalohet kandidimi i të gjithë individëve që kanë dosje si bashkëpunëtor të ish sigurimit të shtetit dhe ish sekretarët e partisë së punës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
