Kryeministri Edi Rama, ka ndjekur nga afër punimet në Thumanë, zona e cila u dëmtua më shumë nga tërmeti i 26 nëntorit të 2019.
Rama u shpreh se tashmë vijon puna në këtë zonë për pallatet e reja, ndërsa shkolla e re është drejt përfundimit.
“Ky është një model shembullor i zhvillimit urban dhe social. Tani që merr formë dalin në pah vlerat e projektit, në këtë kënetë ku toka ishte e paqëndrueshme, godinat një tmerr, bëhet një zonë e cila ka vlera të mëdha për të ardhmen e njësisë Thumanë. Ndërsa duhet parë me zgjuarsi se si të motivohen disa agroturizme të vogla duke e kthyer në një vijë turistike”, u shpreh Rama.
Ndërsa Arben Ahmetaj u shpreh se ky proces është ndarë në 4 projekte madhore, ndërtimin e infrastrukturës nëntokësore, pallatet, banesat individuale dhe shkollën.
Ai tha se po ndërtohen 155 njësi individuale, 14 pallate ku 13 prej të cilave financohen nga buxheti i shtetit dhe 1 tjetër nga një donator i huaj.
“Këtu jemi në kantierin e Thumanës, Bashkia e Krujës e ndarë në 4 programe. Programi i infrastrukturës nëntokës, njësive individuale ku janë 155 njësi individuale që po ndërtohen, kemi programin e shkollës, kemi dhe pallatet ku anë 14 pallate, 278 apartamente, 13 ndërtohen nga buxheti i shtetit dhe vetëm 1 nga donatorët. Kemi një ndërtesë që do jetë për administratën e Bashkisë. 32.600 familje që përfitojnë nga plani i rindërtimit”, tha Ahmetaj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
