Bypassi i Shkodrës u bë shkak për debat mes kryeministrit Rama dhe ish-kryeministrit Berisha gjatë diskutimit sot në Parlament. Rama tha se për bypassin e Shkodrës, një projekt i qeverisë “Berisha”, sot nuk janë dakord as vetë demokratët. “Ju nga përmbytja e Shkodrës nxorët atë bypass-in e Bunës që ka ngritur tërë demokratët me në krye Voltana Ademin. Ata kërkojnë të ndryshohet projekti”, tha Rama.
Ndërsa ish-kryeministri Berisha e akuzoi Ramën se një ndryshim i projektit do të kishte shkak vetëm dëshirën për të abuzuar me fonde të tjera. Berisha tha se bypassi i Shkodrës u projektua me konsulencën e tre ekspertëve më të mirë të Europës në fushën e menaxhimit të ujërave.
“Gjatë mandateve të qeverisë tonë, Shkodra u përmbyt 3 herë. Në njërën prej tyre po shkonte drejt apokaliptikes, ujërat arritën në qytet deri në 2 m lartësi. Nuk u hapën digat. Digat e shpëtuan Shkodrën. Ajo u përmbyt nga liqeni që mblidhte 9 mijë metër kub në sekondë nga alpet e Malit të Zi. Liqenet e Fierzës e mbrojtën. Po të hapeshin portat, Shkodra do të njihte një gjëmë të madhe. Por falë kryetarit të bashkisë, Shkodra nuk pati asnjë viktimë. Janë marrë në Shqipëri 3 grupe më të shquarat për ujërat. Holanda, Britania dhe Italia sollën ekspertët më të mirë. Ka konkluzione aty. Thuhet se dy ishin jetike: ndërtimi i asaj që ti i thua digë dhe i ndërpreve financimin si kusht për të mbrojtur Shkodrën nga liqeni. Bypassi dhe vetëm ai mund të ishte e vetmja mënyrë për të mbrojtur nga përmbytja nga liqeni dhe nga fryrja e Bunës. Ti ndërpreve financimin për të. Bypassi i Shkodrës shkon nga 40-60 milionë euro. Ai u shndërrua në digë sepse ky ishte sugjerimi më i fuqishëm për të mbrojtur Shkodrën. Mos e ndërto, riprogramoje për të vjedhur, por ta dish se Shkodra është më në rrezik se çdo qytet tjetër në Ballkan”, tha Berisha.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
