Presidenti i Këshillit Europian, Antonio Costa, ka bërë thirrje për përshpejtimin e procesit të zgjerimit të Bashkimit Europian, duke argumentuar se integrimi i vendeve kandidate është një domosdoshmëri strategjike për të ardhmen e kontinentit.
Duke folur për Ballkanin Perëndimor, Costa veçoi Malin e Zi si vendin që ka shënuar progresin më të madh në negociatat e anëtarësimit. Ai vlerësoi reformat e ndërmarra nga Podgorica dhe tha se objektivi për t’u anëtarësuar në Bashkimin Europian deri në vitin 2028 është i arritshëm.
Mali i Zi po ecën shumë mirë. Nëse ruan ritmin aktual të reformave, objektivi i vitit 2028 është realist dhe i mundshëm.
Sipas tij, zgjerimi i Bashkimit Europian nuk duhet parë si barrë institucionale, por si një mundësi për ta bërë Europën më të fortë, më të sigurt dhe më konkurruese në arenën globale.
Një Europë më e bashkuar është një Europë më e fortë. Kjo është arsyeja pse zgjerimi duhet të mbetet një nga prioritetet tona kryesore në vitet e ardhshme.
Në një intervistë për EuropeToday, Costa theksoi se Bashkimi Europian duhet të ecë paralelisht në dy drejtime, të avancojë procesin e zgjerimit dhe njëkohësisht të reformojë mekanizmat e brendshëm të vendimmarrjes.
Zgjerimi nuk është vetëm një proces administrativ. Ai është investimi më i rëndësishëm politik që mund të bëjmë për paqen, sigurinë dhe prosperitetin e Europës.
Sipas tij, situata gjeopolitike e viteve të fundit ka treguar se Bashkimi Europian duhet të jetë më i shpejtë dhe më i vendosur në integrimin e vendeve që kanë përmbushur kushtet për anëtarësim.
Ai theksoi se vendet e Ballkanit Perëndimor, së bashku me Ukrainën dhe Moldavinë, kanë një perspektivë të qartë europiane që duhet të mbështetet me hapa konkretë.
Costa ngriti gjithashtu çështjen e reformimit të mënyrës së vendimmarrjes brenda unionit, duke argumentuar se unanimiteti nuk është i nevojshëm në çdo fazë të procesit të zgjerimit.
Ne nuk duhet të lejojmë që procedurat të kthehen në pengesë për ambiciet strategjike të Europës. Ka mënyra për të avancuar procesin pa cenuar standardet dhe kriteret e anëtarësimit.
Presidenti i Këshillit Europian ritheksoi se procesi i anëtarësimit duhet të mbetet i bazuar në meritë, ku çdo vend kandidat vlerësohet sipas progresit në reforma, forcimit të shtetit të së drejtës dhe harmonizimit me legjislacionin europian.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
