Partia Demokratike e sheh të domosdoshëm nisjen e hetimeve nga ana e SPAK-ut lidhur me vendimin e qeverisë për të rikthyer kazinotë. Në një deklaratë nga selia blu, sekretari për çështjet ligjore në PD, Çlirim Gjata, tha se me këtë vendim, kryeministri Rama kërkon të pastrojë paratë e pista.
“Ai kërkon të pastrojë paratë nëpërmjet kazinove dhe lojërave të fatit. Shqetësimi i Ramës nuk janë familjet, por paratë që i duhen në ortakëri me krimin. Kjo prerje në besë dhe ky veprim kriminal duhet të hetohet nga SPAK”, u shpreh Gjata.
Gjata tha se vendimi është marrë në kushtet e panikut nga rezultati i zgjedhjeve të prillit dhe pritet të rëndojë në ekonominë e shumë familjeve.
“Nën panikun e humbjes që e pret, Rama ka shkelur një premtim që ka bërë, që nuk do lejonte që lojërat e fatit të shkatërronin mijëra jetë njerëzish dhe familjesh. Në fshehtësi ai ka miratuar një VKM që i hap rrugë biznesit kriminal të lojërave të fatit në zemër të Tiranës”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
