Presidenti i vendit, Ilir Meta është duke zhvilluar një vizitë zyrtare në Hungari, ku ditën e sotme është pritur në një takim nga Kryeministri Viktor Orbán.
Meta i shprehu mirënjohjen Kryeministrit Orbán për mbështetjen domethënëse dhe pa rezerva sipas tij, që i ka dhënë Shqipërisë për çeljen e negociatave të anëtarësimit me Bashkimin Europian.
Pasi vlerësoi angazhimin e Qeverisë së Kryeministrit Orbán për të nxitur dhe thelluar më tej marrëdhëniet ekonomike dhe tregtare midis dy vendeve, Meta vuri në pah gatishmërinë dhe vullnetin e palës shqiptare për t’i shndërruar ato në të njëjtin nivel të shkëlqyer, siç janë marrëdhëniet politike mes dy vendeve.
Në këtë kuadër, Kryetari i Shtetit shqiptar, pasi evidentoi se pas hapjes së Dhomës së Tregtisë së Hungarisë në Tiranë, bashkëpunimi ekonomik dhe fluksi turistik është rritur, theksoi se është e domosdoshme edhe vazhdimësia e fluturimeve nëpërmjet linjës ajrore direkte mes dy kryeqyteteve.
Presidenti Meta dhe Kryeministri Orbán vlerësuan gjithashtu se vitin e ardhshëm të dyja vendet do të festojnë 100-vjetorin e vendosjes së marrëdhënieve diplomatike me rezultate edhe më domethënëse e të prekshme.
Orbán nga ana e tij e siguroi Presidentin Meta për mbështetjen e vazhdueshme dhe të palëkundur të Qeverisë së tij për Shqipërinë dhe shqiptarët, me qëllim forcimin e mëtejshëm të miqësisë historike dhe tradicionale midis dy popujve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
