Kreu i PD-së, Lulzim Basha reagon sërish në lidhje me rastin e Xhisiela Malokut.
Basha publikon një video në rrjetet sociale duke u shprehur se Rama për të mbrojtur Taulant Ballën po gënjen sërish.
Sipas Ramës letrën e Emiljano Nuhut e publikoi Taulant Balla.
Por për Bashën e vërteta është krejt ndryshe pasi ajo fillimisht u publikua në intervistën e televizionit Shijak.
“Edi Rama gënjen paturpësisht për të fshehur krimin e Taulant Ballës në Policinë e Fushë Krujës.”- shkruan Basha, me videon e të cilit ka një pjesë nga deklarata e Edi Ramës një natë më parë.
“Edi Rama- Taulant Balla e nxori vetë këtë gjë. Doli në media dhe lexoi letrën e atij (Nënkomisar Nuhut)
Sokol Balla - Po, pasi u publikua intervista e tij.
Edi Rama - Si more pasi u publikua? E dini ju gjithë kronologjinë apo jo? Taulant Balla po të them.
Në video shpjegohet se Shijak TV e transmetoi intervistën dhe letrën e nënkomisar Emiljano Nuhut në orën 13.46 të datës 26 Shtator, ndërsa Taulant Balla doli në media në orën 15.06.
Për të provuar këte në video krahasohet orari i transmetimit luve në Facebook të Shijak TV dhe Taulant Ballës.
“Sa herë kapet në krim, Edi Rama mashtron për të mbrojtur pushtetin e tij të lidhur me krimin. Politikanët e lidhur me krimin duhet të largohen. Veting pa vonesë.” - thuhet në mesazhin e Lulzim Bashës.
