Gjatë punimeve të Mbledhjes së 121-të Plenare të Bordit Evropian për Mbrojtjen e të Dhënave (EDPB), zhvilluar në Bruksel, Komisioneri për të Drejtën e Informimit dhe Mbrojtjen e të Dhënave Personale, Besnik Dervishi, ngriti në nivel evropian çështjen e vlerësimit të progresit të vendeve kandidate në fushën e mbrojtjes së të dhënave personale.
Gjatë sesionit të diskutimit me Komisionerin Evropian për Demokracinë, Drejtësinë, Sundimin e Ligjit dhe Mbrojtjen e Konsumatorit, Michael McGrath, Dervishi paraqiti progresin e arritur nga Shqipëria në harmonizimin e legjislacionit kombëtar me Acquis të Bashkimit Evropian në fushën e mbrojtjes së të dhënave personale.
Dervishi theksoi se Shqipëria ka miratuar një ligj të ri për mbrojtjen e të dhënave personale, plotësisht të harmonizuar me Rregulloren e Përgjithshme për Mbrojtjen e të Dhënave (GDPR) dhe Direktivën 2016/680 për autoritetet e zbatimit të ligjit, disponon një autoritet mbikëqyrës të pavarur në përputhje me standardet evropiane dhe kontribuon prej vitit 2016 në punën e Bordit Evropian për Mbrojtjen e të Dhënave (EDPB) në cilësinë e vëzhguesit.
Duke iu referuar faktit se, pavarësisht këtij progresi, nivelit të lartë të përafrimit me standardet evropiane dhe duke u konsideruar në të njëjtin nivel me vendet anëtare të BE-së, Shqipëria ende vijon të konsiderohet vend i tretë për qëllime të transferimit të të dhënave personale.
Në këtë kontekst Komisioneri Dervishi theksoi nevojën që progresi i vendeve kandidate të vlerësohet në mënyrë objektive dhe në përputhje me nivelin e harmonizimit të legjislacionit dhe kapaciteteve institucionale me Acquis të Bashkimit Evropian me ritme më të shpejta.
Në përgjigjen e tij, Komisioneri Evropian Michael McGrath vlerësoi progresin e Shqipërisë në procesin e përputhshmërisë së legjislacionint me standardet e Bashkimit Evropian në fushën e mbrojtjes së të dhënave personale.
Ai theksoi se marrëdhënia e Bashkimit Evropian me Shqipërinë në këtë fushë zhvillohet në kuadër të një procesi më të gjerë dhe më ambicioz, të lidhur drejtpërdrejt me procesin e anëtarësimit në BE, i cili përfshin një nivel më të avancuar integrimi sesa një vendim i veçantë për përshtatshmërinë (adequacy). Gjithashtu, ai nënvizoi se transferimet e të dhënave personale mund të realizohen në përputhje me mekanizmat dhe instrumentet e parashikuara nga legjislacioni në fuqi.
Gjatë mbledhjes plenare, pjesëmarrësit diskutuan gjithashtu një sërë çështjesh me rëndësi për zhvillimet më të fundit në fushën e mbrojtjes së të dhënave personale në Bashkimin Evropian, përfshirë anonimizimin e të dhënave, njoftimin e shkeljeve të sigurisë, ndërveprimin ndërmjet Rregullores së Përgjithshme për Mbrojtjen e të Dhënave Personale (GDPR) dhe Aktit për Tregjet Digjitale (Digital Markets Act), si dhe sfidat që lidhen me përdorimin e inteligjencës artificiale dhe teknologjive të reja.
Pjesëmarrja aktive e Autoritetit Shqiptar në punimet e EDPB-së dhe diskutimet e zhvilluara në nivel të lartë evropian konfirmojnë angazhimin e vazhdueshëm të Shqipërisë për përmbushjen e standardeve të Bashkimit Evropian në fushën e mbrojtjes së të dhënave personale, si pjesë e procesit të integrimit evropian dhe forcimit të të drejtave themelore të qytetarëve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
