Në Dhomat e Specializuara të Kosovës në Hagë, është marrë vendimi për vazhdimin e paraburgimit për Hashim Thaçin edhe për dy muaj të tjerë, lidhur me rastin ku ai akuzohet për krime lufte, së bashku me Kadri Veselin, Rexhep Selimin dhe Jakup Krasniqin. Vendimi u mor nga kryetari i trupit gjykues, Charles Smith III, më 11 qershor 2025.
Prokuroria ka argumentuar se Thaçi vazhdon të paraqesë rrezik për arratisje, pasi është i njohur me akuzat serioze që janë konfirmuar ndaj tij.
Ata po ashtu theksuan se, tani që çështja e Prokurorisë ka përfunduar dhe Thaçi ka informacion të plotë për provat që janë kundër tij, ai mund të ketë mundësinë të ndikojë në procedura dhe të pengojë procesin.
Një tjetër aspekt që ka shqetësuar Prokurorinë është fakti që Thaçi mund të ketë akses në informacion të ndjeshëm lidhur me dëshmitarët dhe provat që do të paraqesë mbrojtja e viktimave.
Po ashtu, Prokuroria theksoi se Thaçi ka aktakuzë për pengim të procedurave, që rrit mundësinë e tij për arratisje.
Ndërkohë, mbrojtja e Thaçit, e udhëhequr nga avokati Luka Mishetiq, ka kundërshtuar këto pretendime, duke pohuar se as gjykatësi i procedurës paraprake dhe as trupi gjykues nuk kanë konstatuar ndonjëherë rrezik për arratisje.
Ata gjithashtu theksuan se argumentet e Prokurorisë janë të përsëritura dhe të refuzuar më parë.
Për sa i përket akuzës për pengimin e procedurave, trupi gjykues ka deklaruar se ky argument mund të shqyrtohet veçmas, por nuk e ka konsideruar si një arsye bindëse për të mbështetur pretendimin për arratisje. Megjithatë, ata konfirmuan se rreziku për pengim të procedurës mbetet i pranishëm, sidomos duke marrë parasysh klimën e mundshme të ndërhyrjes ndaj dëshmitarëve në Kosovë.
Në fund, trupi gjykues ka urdhëruar që paraburgimi i Hashim Thaçit të vazhdojë edhe për dy muaj të tjerë, duke theksuar se asnjë masë alternative, përfshirë edhe lirimin me kusht, nuk do të mjaftonte për të zbutur rreziqet ekzistuese të procesit.
Aktakuza ndaj Hashim Thaçit dhe bashkëluftëtarëve të tij u konfirmua më 26 tetor 2020, dhe përbëhet nga dhjetë pika me akuza për krime lufte dhe krime kundër njerëzimit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
