Ministri i Brendshëm, Fatmir Xhafaj ishte ditën e sotme në Durrës, ku ka pasur takim me banorët e këtij qyteti në kuadër të nismës “policia në Komunitet.”
Gjatë fjalës së tij, Xhafaj dha alarmin se midis 9 grupeve kriminale që janë nën hetim një numër i madh i tyre vepron prej 15 vitesh edhe në qytetin bregdetar. Sipas ministrit grupet me rrezikshmëri të lartë kriminale janë skeduar dhe një pjesë e drejtuesve të tyre janë vënë në pranga ndërkohë që i ka paralajmëruar se pas arrestimit veprimi i radhës do të jetë sekuestrimi i aseteve të vënë nga aktivitete e paligjshme.
"Një pjesë e tyre grupe kriminale, rreth 9 të tilla në shkallë vendi janë në proces hetimi dhe duke mbajtur në konsideratë faktin se janë arrestuar një numër i caktuar personash si pjesë e këtyre grupeve kriminale. Krahas ndëshkimit të tyre ligjor, ne jemi të fokusuar edhe tek hetimi dhe goditja e aseteve kriminale të tyre. Nuk e pranoj faktin që 2 apo 3 grupe, janë grupe që kanë aktivitet të gjatë në shumë vite, ndoshta 10-15 vjet në qytetin e Durrësit dhe janë grupe me rrezikshmëri të lartë shoqërore, janë karakteristika të këtij komuniteti", tha Xhafaj.
Duke folur për operacionin Forca e Ligjit, ministri tha se strukturat e ngritura, task forcat qendrore dhe ato rajonale kanë bërë hapin e parë atë të skanimit të grupeve kriminale dhe pasurisë që posedojnë ata.
Ndërsa drejtori i Policisë së Shtetit Ardi Veliu deklaroi se qëllimi i takimit është të identifikojë problematikat e në këtë qytet.
"Qëllimi kryesor i këtij takimi është që të identifikojmë problematikat në qytetin e Durrësit dhe të marrim masat në rritjen e parametrave të sigurisë", tha Veliu.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
