Këshilli i Ministrave ka hapur aplikimet për funksionin e kryetarit të Komisionit të Prokurimit Publik dhe tre anëtarëve. Afati i dorëzimit të aplikimeve përfundon më 28 maj.
Pas vlerësimit të CV-ve që do të bëjë komisioni ad-hoc i ngritur në Kryeministri, aplikantët do t’i nënshtrohen intervistës me gojë. Në përfundim të procesit, lista e kandidatëve të kualifikuar i kalon Kuvendit.
Sipas njoftimit të shpallur në faqen zyrtare të Kryeministrisë, aplikanti duhet të plotësojë disa kritere, ndër të cilat duhet të ketë mbi 8 vjet përvojë pune, nga të cilat të paktën 3 vjet në fushën e prokurimeve dhe, të paktën, 2 vjet në pozicion drejtues.
Ndër dokumentet që aplikanti duhet të dorëzojë është edhe formulari i vetëdeklarimit në zbatim të ligjit “Për garantimin e integritetit të personave që zgjidhen, emërohen ose ushtrojnë funksione publike”, të ndryshuar.
Posti i kreut të KPP është mbajtur nga Jonaid Myzyraj, për të cilin dy javë më parë Prokuroria e Posaçme kërkoi pushimin e çështjes në ngarkim të tij.
Myzyri u lirua nga çdo akuzë pasi ishte marrë i pandehur nga Prokuroria e Posaçme verën e kaluar, për një procedurë me vlerë 2.2 miliardë lekë të vjetra.
SPAK njoftoi në atë kohë se Myzyri akuzohej për veprën penale “Shkelje e barazisë së pjesëmarrësve në tendera apo ankande publike”, e kryer në bashkëpunim.
Ai u pezullua menjëherë nga detyra, ndërsa si masë shtrënguese iu caktua “detyrim paraqitjeje”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
