Ministria për Evropën dhe Punët e Jashtme e Republikës së Shqipërisë reagoi ashpër ndaj deklaratës së Ministrisë së Jashtme të Serbisë më 4 tetor 2025, duke e cilësuar si një përpjekje për të ringjallur tensionet dhe narrativat e së kaluarës në një rajon që aspiron për paqe dhe integrim evropian.
Në një komunikatë zyrtare, Ministria shqiptare shprehu keqardhje për përpjekjet e Serbisë për të “rikthyer hijet e së shkuarës” në Ballkan dhe hodhi poshtë akuzat e pabaza dhe motivet politike që sipas saj qëndrojnë pas tyre.
“Ministria për Evropën dhe Punët e Jashtme e Republikës së Shqipërisë i hedh poshtë me forcë dhe vendosmëri akuzat dhe pretendimet e pabaza të ngritura në deklaratën e Ministrisë së Jashtme të Serbisë,” thuhet në reagim.
Shqipëria kujtoi gjithashtu të vërtetat historike lidhur me vitin 1999 dhe pasojat e luftës në Kosovë, duke theksuar se ngjarjet tragjike sollën vrasje, spastrime etnike dhe dëbimin me forcë të rreth një milioni shqiptarëve nga shtëpitë e tyre.
Në reagim, Ministria shqiptare iu përgjigj edhe referencës që Serbia i bëri raportit të Dik Martit, duke e cilësuar atë si të pabesueshëm dhe të tejkaluar.
“Është për të ardhur keq që deklarata e Ministrisë së Jashtme të Serbisë mbështetet ende mbi një Raport tashmë të diskredituar të Dik Martit, kur faktet e hetuara nga autoritetet vendase dhe ndërkombëtare kanë dëshmuar qartë se pretendimet e ngritura aty janë një fabrikim i pastër, pa asnjë provë faktike”
Më tej, Shqipëria thekson se këto përpjekje për të manipuluar të kaluarën janë të papranueshme.
“Çdo përpjekje për të përmbysur të vërtetën dhe për të ndërruar rolet e viktimës me të agresorit është e papranueshme dhe bie ndesh me çdo frymë të paqes e pajtimit që rajoni ynë kërkon e meriton”, thuhet tutje në reagim.
Ministria për Evropën dhe Punët e Jashtme të Shqipërisë në këtë reagim vë theksin mbi përgjegjësinë për të ndërtuar të ardhmen mbi të vërtetën:
“Historia nuk rishkruhet me retorikë, ajo mbahet mend me përgjegjësi”, thuhet në reagim.
Në përfundim, Ministria shpreh angazhimin e Shqipërisë për bashkëpunim rajonal dhe fqinjësi të mirë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
