Ish-kryeministri Berisha thotë se opozita nuk do të lejojë në asnjë mënyrë marrëveshjen e përfolur me Greqinë për kufijtë detarë. Në një deklaratë për mediat pas daljes nga seanca e sotme, Berisha iu referua deklaratës së ministrit të Jashtëm, Nicos Kotzias, në lidhje me 12 milje det në favor të Greqisë. Berisha tha se një marrëveshje e tillë mund të miratohet vetëm nëse kalohet mbi trupat e deputetëve demokratë.
“Kocias e ka të vërtetë deklaratën. Me vendosjen e copave në tavolinë, Edi Rama ka dorëzuar fushat e gazit më të mëdha të rajonit. I takonin tërësisht Shqipërisë, sipas marrëveshjes tonë I takonin Shqipërisë. Marrëveshja jonë ishte për distancë të baraslarguar. Marrëveshja e Ramës është po të jap thërrime, llokmën po e mbaj për vete. Rama nuk mund ta kalojë atë marrëveshje pa kaluar mbi trupat tanë. Edi Rama do ta paguajë me të gjitha çmimet e merituara nëse e bën një gjë të tillë”, tha ai.
Duke iu rikthyer seancës së sotme, Berisha akuzoi Ramën për abuzim financiar përmes aeroportit të Vlorës.
“Siç e konstatuan të gjithë shqiptarët, një bandë hajdutësh të lidhur me krimin, që për këtë pupull quhet qeveri, në një akt të pashembullt në historinë e Parlementit përjashtoi kryetarin e grupit parlamentar për të krijuar një situatë në të cilën të kalojë hajdutësisht ligjin e vjedhjes më të madhe, aeroportit Habilaj. Po bëhet me një çmim 5-6 herë më të madh se aeroporti i Kukësit. Çdo shqiptar duhet ta dijë se çfarë është mbi 20 milionë, shkon në xhepat e Edi Ramës dhe individëve të tjerë që bëjnë pasuri me krimin. E bënë këtë akt të paprecedent sepse janë të ngërthyer në një skandal të tmerrshëm”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
