Në një dalje para mediave sot në mesditë, kryetarja e LSI-së, Monika Kryemadhi, foli për protestën që opozita ka paralajmëruar për në datën 27 janar. Kryemadhi tha se protesta do të jetë paqësore, ndërsa rikujtoi 21 janarin e 2011-s si modelin e një proteste të dhunshme. Ajo akuzoi kreun e qeverisë, Rama, se i ka varfëruar shqiptarët dhe tani përpiqet t’i blejë me paratë e drogës.
“Shqiptarët janë aq të lodhur dhe aq të zhgënjyer me klasën politike dhe protesta e 27 janarit do të jetë një protestë paqësore ku të gjithë shqiptarët që janë të pashpresë, që janë të papunë, i ftojmë të protestojnë me prezencën tonë. Edhe pse ai kërkon të blejë varfërinë me paratë e drogës, shpirtin nuk ua blen dot. Në imazhin e shqiptarëve është krijuar ideja e protestave të dhunshme, dhunën e solli Rama në 21 janar”, tha ajo.
Lidhur me protestën që PD dhe LSI do të mbajnë më 27 janar, Kryemadhi tha se policia nuk duhet t’i provokojë qytetarët.
“Protesta e dhjetorit ishte paqësore. Policia dhunoi disa gra dhe vajza. Dhuna nuk është nga njëra anë, dhuna është kush e provokon dhe policia duhet të jetë e kujdesshme të mos provokojë qytetarët. Rrugët e Tiranës dhe gjithë Shqipërisë janë jo vetëm për të ecur por edhe për të protestuar, në një vend demokratik siç pretendojmë që jemi”, tha Kryemadhi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
