Ministri i Brendshëm, Fatmir Xhafaj gjatë fjalës së tij në parlament ka folur për takimin e ditëve të fundit me ekspertë amerikanë të FBI-së e DEA-s. Xhafaj deklaroi se në takimet e shumta me ekspertë të FBI dhe DEA, është folur për çështje konkrete dhe shumë të rëndësishme, dhe janë shenjë e dukshme e besimit reciprok të konsoliduar mes nesh me këto dy agjenci ligjzbatuese me reputacion të padiskutueshëm ndërkombëtar.
Ministri ka folur për rezultatet e goditjes së disa grupeve kriminale dhe për kapjen vrasësit me pagesë.
"Rezultatet e para, goditja e disa grupeve kriminale kohët e fundit si ato në Shkodër, në Tiranë me aksionin spektakolar të policisë në kapjen në kohë rekord të vrasësit me pagesë, i cili për nga profesionalizmi i treguar është i krahasueshëm më atë të vendeve perëndimore, sekuestrimet e dy ditëve më parë në Lezhë dhe aksioni i gjerë, tejet profesional i Policisë i konkretizuar gjatë natës së mbrëmshme në Elbasan dhe sot gjatë ditës në Shkodër, janë një dëshmi e qartë e rritjes së forcës goditëse të Policisë së Shtetit nëpërmjet përmbushjes së përgjegjësive të saj sipas ligjit", deklaroi ministri.
Xhafaj nënvizoi se operacioni “Forca e Ligjit”, nuk është thjesht një projekt, por një realitet i prekshëm dhe do vazhdojë të jetë i tillë në ditët dhe muajt në vijim ndaj dha mbështetje policisë.
"Jam i vendosur të mbështes Policinë e Shtetit në misionin e saj për rend dhe siguri publike në nivelin më të lartë, të inkurajoj dhe mbështes fort strategjinë e Policisë për goditjen e grupeve kriminale dhe elementëve të lidhur me to, duke dërguar përpara drejtësisë cilindo, i vogël apo i madh qoftë ai. Policia është aty për të bërë pikërisht këtë gjë. Por, ajo duhet mbështetur në këtë betejë të ashpër me krimin", vazhdoi më tej ministri.
Xhafaj u ndal dhe tek marrëveshja e nënshkruar mes Prokurorisë dhe Ministrisë së Brendshme, duke thënë se nuk krijon norma të reja juridike për veprimtarinë e Prokurorisë.
"Nuk ka deliruar akoma askush nga Policia, Prokuroria, apo edhe Ministria e Brendshme për të bërë atë çfarë ata që janë kundër kësaj marrëveshje po e thonë këto ditë. Ajo marrëveshje nuk krijon norma të reja juridike për veprimtarinë e Prokurorisë dhe Policisë", tha Xhafaj.
Reforma në Drejtësi, sipas ministrit Xhafaj ishte projekti më madhor i cili lindi si domosdoshmëri për të rindërtuar sistemin aktual të drejtësisë, bazuar në një kërkesë të fortë popullore, kishte që në fillimet e saj inkurajimin dhe mbështetjen e partnerëve ndërkombëtarë, BE dhe veçanërisht të SHBA.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
