Reforma në drejtësi është guri i themelit në luftën kundër korrupsionit, u shpreh të mërkurën ministri i Shtetit për Çështjet Vendore, Bledi Çuçi, njëkohësisht Koordinator në luftën kundër Korrupsionit.
Deklarata e minisrit u bë gjatë takimit me temë “Shqipëria dhe BE, të bashkuar në luftën kundër korrupsionit”, në kuadër të Projektit të Binjakëzimit ndërmjet Austrisë, Gjermanisë dhe Shqipërisë i financuar nga BE për zbatimin e politikave kundër korrupsionit, mbajtur në Fakultetin e Shkencave Sociale, në Tiranë.
Ai theksoi se duhet vendosmëri në zbatimin e saj për t’i dhënë fund njëherë e përgjithmonë kulturës së pandëshkueshmërisë.
Ministri Çuçi iu referua një raporti të publikuar nga Transparency International(TI) për matjen e perceptimit ndaj korrupsionit në Europë dhe Azinë Qendrore, i cili e rendit Shqipërinë mes 5 vendeve të para.
“Një grafik i qartë që flet për perceptimin e veprimeve të qeverisë ku Shqipëria renditet pozitivisht në 5 vendet e para është dhe një përgjigje ndaj skeptikëve në këtë drejtim”, tha Çuçi.
Lufta ndaj këtij fenomeni, theksoi ai, nuk është e lidhur vetëm me punën e institucioneve, por ajo është një sfidë dhe për shoqërinë shqiptare.
Në fjalën e tij Drejtori për Zgjerimin në KE, Danielsson, e vlerësoi esenciale për Shqipërinë, luftën kundër korrupsionit.
Duke siguruar për mbështetjen e KE-së në këtë drejtim, Danielsson tha se progresi në luftën kundër këtij fenomeni do të thotë progres dhe në luftën ndaj krimit të organizuar.
Ai përsëriti nevojën e një zbatimi të besueshëm të reformës në drejtësi dhe mbi të gjitha të ligjit të Vettingut, ndërsa theksoi rëndësinë e luftës kundër korrupsionit edhe në shërbimet publike, por dhe kontrollin e pasurisë së gjyqtarëve dhe prokurorëve, gjë që do rriste besueshmërinë në këtë drejtim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
