Pas takimeve “kokë më kokë” me shefin e politikës së jashtme të BE-së, Josep Borrell, dhe të dërguarin e BE-së për bisedimet Kosovë-Serbi, Mirosllav Lajçak dy krerët e shteteve, kryeministri i Kosovës, Albin Kurti, dhe presidenti i Serbisë, Aleksandar Vuçiç, kanë nisur takimin e përbashkët në Ohër të Maqedonisë së Veriut, ku pritet të diskutohet për planin e zbatimit të Marrëveshjes së dakordësuar më 27 shkurt në Bruksel.
Paraprakisht, Kurti dhe Vuçiç takuan ndaras Borrell’in, dhe të dërguarin e BE-së për bisedimet Kosovë-Serbi, Mirosllav Lajçak.
Takimi trepalësh ishte paraparë të fillojë në orën 13:30, por ka nisur me afro dy orë vonesë.
Pas takimit trepalësh Përfaqësuesi i Lartë i BE-së për Politikë të Jashtme e Siguri, Josep Borrell, do të japë një deklaratë për media.
Kurti para fillimit të takimeve të nivelit të lartë në kuadër të dialogut Kosovë – Serbi, ka thënë se në Ohër ka ardhur për bisedime për të arritur marrëveshje.
Megjithatë ai ka bërë të ditur se nuk ka tekst të përfunduar për planin e zbatimit të Marrëveshjes së dakordësuar më 27 shkurt në Bruksel, prandaj do të ketë bisedime për këtë çështje.
I dërguari i Shteteve të Bashkuara të Amerikës për Ballkanin Perëndimor, Gabriel Escobar, tha se pret finalizimin e aneksit të zbatimit të Marrëveshjes drejt normalizimit midis Kosovës dhe Serbisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
