Kryetari i Partisë Demokratike, Lulzim Basha të mërkurën mori pjesë në Samitin e Liderëve të Bashkimit Europian dhe Ballkanit Perëndimor të Partisë Popullore Europiane (PPE), në kuadër të Samitit të Zagrebit.
Përmes një njoftimi për mediat, mësohet se Basha ka kërkuar mbështetjen e Bashkimit Europian, pasi sipas tij, kriza ekonomike që ka përfshirë vendin është thelluar me numrin e lartë të vendeve të punës të humbura gjatë këtyre 2 muajve.
Krydemokrati ka folur dhe në lidhje me procesin e negociatave, ndërsa shton se plotësimi dhe zbatimi i kushteve është rruga drejt hapjes së negociatave dhe zgjidhjes së krizës së thellë politike në vend.
Ndërkohë, teksa i është referuar raportit të fundit të Freedom House, Basha ka shprehur domosdoshmërinë e reagimit të shpejtë për të ndalur zhbërjen e standardeve demokratike dhe të proceseve zgjedhore, goditjen ndaj drejtësisë së pavarur dhe lirisë së mediave.
Po ashtu, lideri i PD thekson se kërcënim real për mirëqenien dhe demokracinë përbën edhe rritja e nivelit të korrupsionit, siç konstatohet nga Transparency International.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
