Gjiknuri: Ligji i ri Zgjedhor i hap rrugën aplikimit të votës së emigrantëve

Bashkëkryetari socialist i komisionit të Reformës zgjedhore i përgjigjet opozitës parlamentare e cila sot u shpreh hapur se do të votojë kundër çdo ndryshimi eleketoral nëse nuk përfshihet vota e emigrantëve, depolitizimi i administratës zgjedhore dhe listat e hapura.

Përmes një statusi në Facebook, Gjiknuri thotë se Ligji i ri Zgjedhor i hap rrugën aplikimit të votës së emigrantëve.

“Kam ndjekur me vëmendje reagimet publike rreth çështjes së votës së emigrantëve. Fatkeqësisht, retorika politike rreth dy-tre çështjeve të tjera të reformës e la jashtë vëmendjes së medias trajtimin e zgjidhjes ligjore që është dakordësuar për votën e emigrantëve. Kjo mungesë vëmendjeje u la hapësirë spekulimeve”, thekson ai.  

Gjiknuri bën me dije se vota e emigrantëve është premtim dhe angazhim i marrë nga Partia Socialiste për t’u adresuar, duke shtuar më tej se më kërkesën e PS-së kjo temë u përfshi në axhendën e punës së reformës zgjedhore.

“Në Ligjin e ri Zgjedhor është përcaktuar udhërrëfyesi që do të mundësojë zbatimin e votës së emigrantëve. Në vend që të hartonim dispozita të detajuara në ligj që më pas do të ishin të pazbatueshme dhe do të dështonin, me këshillën e ekspertëve ne zgjodhëm ti japim detyrën Komisionit Qendror të Zgjedhjeve si organi i posaçëm teknik që me Akt Normativ dhe rregulla të posaçme të mundësojë aplikimin e votës në distancë e cila do të shpërndahet sipas qarqeve përkatëse në llogaritjen përfundimtare të rezultatit zgjedhor në Shqipëri”, tha ai.

Sipas tij, ky është një detyrim i ri ligjor për KQZ që nuk e ka patur më pare, ndërsa thekson se miratimi sa më shpejt i Ligjit të ri Zgjedhor do t’i mundësojë këtij institucioni të kryejë të gjithë fazat e përgatitjes së infrastrukturës, për ta bërë të mundshëm aplikimin e votës së emigrantëve që në zgjedhjet e ardhshme.

“Gjej rastin të ftoj të gjithë mekanizmat dhe organizatat e diasporës të bashkëpunojnë me Komisionin Qendror të Zgjedhjeve për të kontribuar bashkarikisht në përcaktimin e teknikaliteteve dhe infrastrukturës më të përshtatshme”, deklaron Gjiknuri.

Ai thekson se qeveria shqiptare është e angazhuar maksimalisht për ti ofruar KQZ-së të gjithë bazën e të dhënave, njohuritë dhe mbështetjen e nevojshme financiare për ta kryer me sukses këtë detyrim ligjor.

“Ne jemi të vendosur ti shkojmë deri në fund këtij procesi për tu mundësuar të gjithë emigrantëve shqiptarë të drejtën e shprehjes me votë në zgjedhje parlamentare”, tha Gjiknuri.