Këtë të martë është arritur një marrëveshje historike mes Athinës dhe Shkupit në lidhje me emrin e shtetit të Maqedonisë, që pas shumë diskutimesh dhe negociatash mes dy vendeve më në fund u vendos të quhej “Republika e Maqedonisë së Veriut”.
Rama ka përshëndetur arritjen e marrëveshjes mes Greqisë dhe Maqedonisë për çështjen e emrit. Përmes një postimi në Twitter, Rama përgëzon fqinjët për emrin e ri Republika e Maqedonisë së Veriut.
“Dy udhëheqës progresivë të vendeve fqinjë shenjuan historinë sot dhe i treguan Bashkimit Europian dhe gjithë botës se kur ka vizion dhe vullnet për të tejkaluar pengesat e së shkuar dhe të gjejnë hapësirat për të parë nga e ardhmja. Respekte për Alexis Tsipras dhe Zoran Zaev. Ballkani sot është një vend më i sigurtë”, shkruan Kryeministri Rama.
Për marrëveshjen e arritur ditën e sotme ka reaguar edhe shefi i diplomacisë shqiptare Ditmir Bushati. Me anë të një mesazhi në Twitter, ministri Bushati shkruan se kjo i hap rrugë jo vetëm një vendi, por të gjithë rajonit drejtë familjes euroatlantike.
“Urime fqinjëve tanë për arritjen e kësaj marrëveshjeje historike. Kjo i hap rrugën jo vetëm një vendi, por të gjithë rajonit drejt familjes Euro-Atlantike. Pavarësisht vështirësive, diplomacia tregoi që funksionon”, shkruan Bushati.
