Kryetarja e Kuvendit, Lindita Nikolla, ka përshëndetur përmes një mesazhi urimi Ditën Ndërkombëtare të Paqes. Në mesazhin e saj, kryeparlamentarja, thotë se edhe Shqipëria ka kontributin e saj të pakursyer për paqe në rajon e më gjerë.
Duke përmendur 40-vjetorin e kësaj dite të shpallur nga Organizata e Kombeve të Bashkuara, e cila vendosi 21 shtatorin si kremtimin e Ditës së Paqes, Nikolla kujtoi kontributin e shtetit shqiptar.
“Më 1981 Asambleja e Përgjithshme e OKB-së vendosi që 21 shtatori të kremtohet si Dita Ndërkombëtare e Paqes. Sot, dyzetë vjet më pas, Shqipëria është bërë një kontribuuese e spikatur e paqes dhe vazhdon të kontribuojë në rritjen e bashkëpunimit, sigurisë, tolerancës e mirëkuptimit në rajon e më gjerë”, shprehet Nikolla.
Nikolla, në mesashin e saj vuri theksin te fakti se Shqipëria si një vend i NATO-s, ka dërguar djemtë dhe vajzat e saj në misione paqeruajtëse në mjaft vatra të nxehta luftërash e konfliktesh anembanë globit.
“Si një vend anëtar i NATO-s, Shqipëria ka dërguar djemtë dhe vajzat e saj në misione paqeruajtëse në mjaft vatra të nxehta luftrash e konfliktesh anembanë globit. Vendi ynë përmbushi me mjaft sukses mandatin e Presidencës së OSBE-së gjatë vitit të vështirë 2020, kur tensioneve e problemeve të krijuara nga luftërat e konfliktet, iu shtua edhe pandemia e Covid -19”, thekson Nikolla.
“Gjatë dy viteve të ardhshme, 2022-2023, Shqipëria do të kontribuojë për paqen e sigurinë në botë, jo vetëm nëpërmjet shembullit, por edhe me vendim-marrjet e saj si anëtare jo e përhershme e Këshillit të Sigurimit të OKB-së”, shton Nikolla.
“Paqja në botë nis nga paqja në çdo vend. Ajo arrihet më lehtë, kur të gjithë kombet përparojnë e zhvillohen, rrisin mirëqenien dhe ofrojnë mundësi e të drejta të barabarta për të gjithë qytetarët, pavarësisht bindjeve politike, përkatësisë etnike e fetare, moshës, gjinisë, origjinës apo gjendjes ekonomike. Shqipëria është një vend i vogël, por partneriteti strategjik me aleatët tanë të mëdhenj, ShBA dhe BE, si edhe kontributi për sigurinë e paqen, për buzëqeshjen e lumturinë e fëmijëve e qytetarëve të të gjithë botës, na bëjnë një vend të madh”, shkruan në mesazhin e saj me rastin e Ditës Ndërkombëtare të Paqes Kryetarja e Kuvendit, Lindita Nikolla.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
