Miratohet projektligji për organizimin dhe funksionimin e Aviacionit Civil

Komisioni i Sigurisë Kombëtare, nën drejtimin e kryetarit, Nasip Naço zhvilloi sot mbledhjen për të shqyrtuar projektligjin për organizimin dhe funksionimin e Aviacionit Civil.

Komisioni i Sigurisë Kombëtare pas shqyrtimit, miratoi nen për nen dhe në tërësi projektligjin për organizimin dhe funksionimin e Aviacionit Civil.

Zëvendëskryetar i Komisionit të Sigurisë Kombëtare, Ferdinand Xhaferaj u shpreh se është depozituar një kërkesë për të thirrur në komisionin në seancë dëgjimore ministrin e Mbrojtjes lidhur me problematikat e vëna re së fundmi.

“E para lidhet me problemin e pronave të ushtrisë ku në vend që të shihnim një reagim të qeverisë në drejtimin e duhur, shikojmë që qeveria ka kaluar një projektligj që zhvesh Policinë Ushtarake nga të gjitha objektivat. Po ashtu dhe situata e rënduar e zjarreve dhe asnjëri nga 4 helikopterët e blerë me taksat e qytetarëve asnjëri nuk është në gjendje pune. I kërkoi komisionit të caktohet dita dhe ora e paraqitjes së ministri të Mbrojtjes në seancë dëgjimore në komision.

Naço bëri të ditur se është depozituar kërkesa në fjalë dhe se i është komunikuar dhe ministri Niko Peleshi, për të cilën do të mbahet edhe një seancë.

Projektligji iniciohet me qellim përshtatjen e tij me "Kodin Ajror te Republikës së Shqipërisë", të miratuar me ligjin 96/2020. Kodi i ri ajror ne nenin 8, krahas detyrave te mëparshme për Autoritetin e Aviacionit Civil, ka përcaktuar se Ligji për organizimin dhe funksionimin e AAC-së përcakton edhe procedurat dhe legjislacionin e aplikueshëm për refuzimin, pezullimin dhe revokimin e licencave, lejeve, autorizimeve dhe certifikatave, legjislacionin e aplikueshëm në rastin e animimit të vendimeve të AAC-se, llojet e tarifave për shërbimet që ofron ky Autoritet, në mënyrën e llogaritjes së tyre, mënyrën e administrimit të të ardhurave të realizuara prej tyre,  përcaktime të cilat nuk ishin të evidentuara në ligjin aktual.