Deputeti socialist Baftjar Zeqaj tha në MCN Live se marrja e vulës së PD nga Rithemelimi nuk fuqizon opozitën, por thjesht garanton 90 për qind të eksponentëve të kësaj partie që do ta kenë emrin në listat për deputetë në zgjedhjet e ardhshme.
"Nuk shoh ndonjë ndryshim të rëndësishëm. Përkundrazi po shoh një lloj fryrje të krerëve të PD, që kjo vulë po i bën më luftarakë, më të fuqishëm. Deputetët u futën ndryshe në sallë, ishin shumë krenarë. Vula s’të sjell gjë. Këta zëre e kishin vulën, sepse Basha po vinte duke u tkurrur. Tani 90 për qind e tyre janë të garantuar për lista. Nuk flasin për fitore, përmbysje, por synimi i tyre është që të jenë në listë. Kanë arritur këtë objektiv që do përfshihen në listat e 2025-ës. I duhej vendit një opozitë më e fortë, i duhej PS-së një program tjetër përballë që nuk ekziston. Vula ishte një regres për PD-në, sepse i dha më shumë krah Berishës. Që grupimi të mbështetet te Berisha, është një hap pas për partinë".
Zeqaj tha që hetimet e SPAK-ut s’do ta dëmtojnë PS-në në zgjedhje.
"PS në asnjë moment s’është prononcuar që SPAK-u s’po mban qëndrim të drejtë duke hetuar cilindo. S’besoj se do dëmtohemi në zgjedhje. Përderisa ne pranuam që të krijohet drejtësia e re, duhet të pranojmë edhe ndëshkimin kur jemi në qeverisje".
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
