Basha kërkon heqjen e vizave nga SHBA për Ramën dhe Tahirin dhe i përgjigjet Koçijançiçit

Kryetari i Partisë Demokratike ka një kërkesë të veçantë për Shtetet e bashkuara të Amerikës: T’i heqin vizën kryeministrit Edi Rama dhe ministrit të Punëve të Brendshme Saimir Tahiri.

Gjatë emisionit “Opinion” që këtë të enjte u zhvillua brenda çadrës ku opozita po mban protestën kundër qeverisë në ditën e 6 të saj, lideri demokrat tha se kreu i qeverisë dhe ministri bien ndesh me ligjet e SHBA-ve.

I pyetur nga gazetari Blendi Fevziu nëse ka frikë nga reforma në drejtësi, Basha u përgjigj: “Për çfarë do të kem unë frikë. Ka ardhur koha që tu hiqet viza Edi Ramës dhe Tahirit. Ata bien ndesh me ligjet e SHBA-se”. 

Basha, ka folur në lidhje me dallimet mes dy forcave politike të koalicionit qeverisës; PS-LSI.

Kreu demokrat tha se mes tyre ekziston një dallim numërik, pasi njëri ka 60 e ca deputetë, ndërsa tjetri ka 18 deputetë.

Basha: Të kuptojnë përgjegjësitë që kanë në këtë moment kyç për Shqipërinë, si forca politike dhe ti hapin rrugë zgjedhjeve të lira dhe të ndershmë nëpërmjet një qeverie që i garanton ata.

Pyetje: Ju nuk bëni asnjë dallim mes Ramës dhe Metës

Basha: Sigurisht që bëj dallim

Pyetje: Cili është dallimi sipas jush?

Basha: Njëri ka 60 e ca deputetë, tjetri ka 18 a 19

Pyetje: Ky është dallim numerik, po në raport me sjelljen?

Basha: Përgjegjësinë e ndaj sëbashku sipas peshës dhe rolit që kanë në qeverisje

Ndërkohë kreu i PD-­së, Basha ka qenë i ashpër edhe me zëdhënësen e BE­-së, Maja Koçijançiç. Kjo e fundit shprehu keqardhjen e saj për sulmet ndaj Vlahutinit dhe tha se BE-­ja po e ndihmon qeverinë që ta luftojë drogën, duke ulur tonet lidhur me atë që opozita e cilëson kanabizim.

I pyetur për këtë deklaratë të zbutur, Basha tha se ai nuk merret me deklarata të zëdhënësve të BE-­së apo të kujtdo tjetër. “Nuk merrem unë me deklaratat e zëdhënësve të BE­-së apo të kujtdo tjetër. Faktet janë aty”, tha ai.