Rama nga Fieri: Nisim punën për ndërtimin e spitalit, administrimi përkohësisht prej ekspertëve turq

Kryeministri i vendit, Edi Rama ka vizituar sot qytetin e Fierit lidhur me situatën e krijuar prej reshjeve të shiut, ku ka folur edhe për ndërtimin e Spitalit Rajonal të Fierit.

Rama ka theksuar se ky projekt i cili do të mbështetet nga qeveria turke, do të jetë përkohësisht nën administrimin e ekspertëve dhe mjekëve turq dhe më pas do të kalojë nën administrimin shqiptar pasi të jenë përcjellë të gjitha kompetencat e nevojshme.

Kryeministri ka folur edhe për vendin ku do të ndërtohet Spitali Rajonal i Fierit, i cili sipas tij duhet të jetë një vend strategjik.

“Nisim punën për Spitalin Rajonal, i cili do të ndërtohet me mbështetjen e qeverisë së Republikës së Turqisë, si dhe do të jetë njëkohësisht një qendër e transferimit të teknologjisë e të dijes nga sistemi shëndetësor turk në sistemin shëndetësor shqiptar, duke u administruar e drejtuar në çdo pavion prej ekspertëve e mjekëve turq për një periudhë tranzitore, deri në kalimin e kompetencave tek drejtuesit shqiptarë, të cilët do të punojnë e mësojnë krah për krah ekspertëve turq. Ky spital që do t'i shërbejë jo vetëm Fierit, do të jetë nga dita e parë pjesë e shërbimit tonë publik shëndetësor dhe natyrisht shërbimi do të jetë FALAS si në çdo spital publik të Shqipërisë” është shprehur Rama.