EURALIUS V vlerëson Inspektorin e Lartë të Drejtësisë

Bashkëpunimi i Inspektorit të Lartë të Drejtësisë me misionin EURALIUS u vlërësua sot përmes një ceremonie të përbashkët për anëtarë të stafeve respektive.

Inspektori i Lartë i Drejtësisë, Artur Metani vlerësoi ndihmesën e vyer të misionit EURALIUS ndër vite në Shqipëri për konsolidimin e sistemit të drejtësisë.

“Është një nga misionet e Bashkimit Europian më produktive dhe më mbështetëse të zhvillimeve institucionale në Shqipëri. Dua të kujtoj drejtuesit e parë, gjyqtarin Coleman dhe Roland Miklau, me të cilët kam patur bashkëpunim gjatë eksperiencës sime profesionale, të cilët vendosën themele të forta të një institucioni me integritet të lartë, e deri tek drejtuesja e sotme, znj. Bernhard”, u shpreh Inspektori i Lartë i Drejtësisë.

Nga ana e saj, dr. Agnes Bernhard vlerësoi lart Inspektorin e Lartë të Drejtësisë, Artur Metani për bashkëpunimin me EURALIUS, e reflektuar edhe përmes ceremonisë së vlerësimit.

“Duhet të kemi momente të tilla, kur gjatë punës që bëjmë, edhe vlerësojmë, edhe vlerësohemi. ILD është më i riu nga institucionet e qeverisjes së drejtësisë, por është një institucion që ka rezultate të shkëlqyera dhe që duhet të jetë shembull për institucionet e tjera. Ju faleminderit shumë për përkushtimin tuaj, lidershipin tuaj dhe angazhimin tuaj në krye të ILD-së”, tha ajo.

Në emër të EURALIUS V, drejtuesja e misionit dr. Agnes Bernhard dorëzoi certifikata vlerësimi për disa punonjës të Zyrës së Inspektorit të Lartë të Drejtësisë, për kontributin e tyre në projekte të përbashkëta në funksion të ILD-së, konkretisht Inspektores Magjistrate Marsela Pepi, këshilltarëve ligjorë Periant Teta, Elona Kana e Isida Koka, si dhe drejtores së drejtorisë së analizës ligjore dhe hartimit të akteve Eljona Bylykbashi.

Ndërsa Metani i dorëzoi një letër mirënjohjeje ekspertes ligjore të EURALIUS V, Anita Mihailova, për angazhimin, kontributin dhe mbështetjen në ngritjen dhe forcimin e kapaciteteve të Zyrës së Inspektorit të Lartë të Drejtësisë.