Në kuadër të një vizite zyrtare në Shqipëri, ministrja e Drejtësisë së Kosovë, Albulena Haxhiu, është pritur sot në takim nga kryetarja e Kuvendit, Lindita Nikolla.
Kryeparlamentarja Nikolla vlerësoi bashkëpunimin midis dy vendeve dhe vuri në dukje se Kuvendi i Shqipërisë dhe Kuvendi i Kosovës do të punojnë ngushtësisht për të nxitur e mbështetur qeveritë dhe institucionet për të çuar përpara bashkëpunimin dhe për të zbatuar marrëveshjet e firmosura dhe ndërmarrë nisma të reja.
Pasi përmendi disa aspekte të bashkëpunimit ekonomik, tregtar, arsimor, kulturor si edhe në fushën e mbrojtjes e të sigurisë midis të dy vendeve, Nikolla u ndal në mënyrë të veçantë në arritjet e reformës në drejtësi.
“Reforma në drejtësi është reforma më e thellë dhe gjithëpërfshirëse e realizuar në Shqipëri gjatë tridhjetë vjetëve të fundit si edhe një aspekt prioritar për integrimin evropian. Reforma po zbatohet me sukses dhe institucionet e reja të sistemit janë tashmë plotësisht funksionale dhe po japin rezultate të prekshme, të shumëpritura e të mirëpritura nga qytetarët”, tha Nikolla.
Kryeparlamentarja Nikolla nënvizoi edhe rëndësinë e bashkëpunimit midis delegacioneve e përfaqësuesve të të dy vendeve në organizatat ndërkombëtare si edhe për mbështetjen më të madhe të Shqipërisë në organizatat ku Kosova nuk është ende anëtare.
Ministrja Albulena Haxhiu falenderoi kryetaren e Kuvendit, Lindita Nikolla, për vlerësimin dhe mbështetjen e bashkëpunimit midis Shqipërisë dhe Kosovës dhe nënvizoi se kjo mbështetje është shumë e rëndësishme për Kosovën.
“Për reformën në drejtësi dhe Vetingun, të cilat sapo i kemi nisur, do të shfrytëzojmë përvojën e suksesshme të Shqipërisë. Me ministrinë e Drejtësisë të Shqipërisë kemi një bashkëpunim të shkëlqyer dhe ky bashkëpunim do të vazhdojë edhe në të ardhmen”, nënvizoi ministrja Albulena Haxhiu.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
