Kryeministri i Kosovës, Albin Kurti nuk ka shkuar sot në takimin e thirrur nga presidenti Hashim Thaçi, i cili gjatë ditës takoi disa nga liderët e partive politike në vend, me qëllim informimin, konsultimin dhe koordinimin për çështje të interesit shtetëror.
Takimi i Thaçit me Kurtin i parashikuar për në orën 13:00 nuk është mbajtur, pasi ky i fundit nuk i është përgjigjur ftesës së Presidentit. Lëvizja Vetëvendosje ka treguar arsyet pse Kurti ka refuzuar ftesën e Thaçit.
“Kryeministri Kurti ka deklaruar tashmë arsyet e mospjesëmarrjes në takimin me presidentin: e para ishte për faktin se sot pati deklarimin e saj në Kuvend Vasfije Krasniqi-Goodman dhe, e dyta sot presidenti paska takuar krerët e partive politike. Në këtë linjë ai ka deklaruar që si kryetar i VV nuk ka interes as gatishmëri ta takojë presidentin, ndërkaq si kryeministër e ka obligim dhe këtë do ta të bëjë në një moment tjetër”, tha zëdhënësi i LVV, Arlind Manxhuka.
Kujtojmë se para disa ditësh, kryeministri Kurti ka kërkuar të takohej me presidentin Thaçi, me arsyen e koordinimit për politikën e jashtme, mirëpo Thaçi nuk ishte paraqitur në takim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
