Deputetja e Partisë Demokratike Jorida Tabaku, ka deklaruar se qytetarët shqiptar lindin të varfër dhe largohen nga vendi në emigrim po të varfër, sepse nuk u jepen mundësi të barabarta. Ajo shtoi se punët janë për militantët e partive dhe miqtë e tyre e jo për qytetarët e aftë që detyrohen të braktisin vendin.
Europa është e ardhmja e paevitueshme edhe në ekonomi! Sfidat me të cilat përballet Shqipëria sot janë të mëdha; një qeverisje që konsiderohet e korruptuar, kriza e agresionit rus në Ukrainë dhe më tej emigrimi që vendit i kushton 630 mln euro për vit. Si mundet ne të ndalojmë një vend që po shpërbëhet duke i dhënë shansin atij të rikuperojë? Duke ndërtuar Europën në Shqipëri. Së pari t’i japim një shans tregut të lirë. Së dyti, meritokracia e cila është baza për një ekonomi konkurruese dhe një shoqëri ku fiton më i zoti dhe shpërblehet i suksesshmi. Së treti, mobiliteti social apo përkthyer ndryshe; sot shqiptarët lindin të varfër dhe largohen nga ky vend të varfër sepse nuk u jepen mundësitë dhe shanset e barabarta. Puna është për mikun apo militantin e partisë dhe jo për të aftët dhe të zotët.
Më tej Tabaku shprehet se fatkeqësisht fokusi i qeverisë ka qenë i bazuar në një tjetër trekëndësh që ka shkatërruar dalëngadalë vendin. Sipas saj, qeveria ka prioritet vetëm PPP, Amnistinë Fiskale dhe Pasaportat e Arta e jo qytetarët dhe ë ardhmen e tyre.
PPP që janë kthyer në makthin e buxhetit, kosto për qytetarët dhe investime që pasurojnë një grusht njerëzish.
Iniciativa e Amnistisë Fiskale dhe Penale që ka qenë kundër produktive dhe që po prish ekuilibrat normal të atyre që kanë paguar përherë taksat dhe detyrimet.
Pasaportat e Arta, një skemë shumë problematike që po ashtu shkatërron parimet e tregut të lirë, meritokracisë dhe mobilitetit social.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
