Partia Socialiste synon fitoren e zgjedhjeve lokale dhe atyre parlamentare të vitit 2025. Në takimin me deputetët e zgjedhur dhe ata që nuk do të jenë më pjesë e Parlamentit të ri, kryeministri Rama tha se socialistët i pret një mandat i vështirë qeverisës, pasi duhet të justifikojë besimin e votuesve dhe njëkohësisht të rrisë partinë.
“Nis puna për dy fitoret e radhës, zgjedhjet lokale dhe ato parlamentare të 2025-s. Mandati i tretë do të jetë më i vështiri në aspektin e rritjes së PS si forcë qeverisëse katër vjet nga sot. Nëse në mandatin e parë nxorëm Shqipërinë nga gropa, tani duhet të vijojmë ta ngjisim lart. Kemi marrë notë kaluese përderisa morëm votëbesimin e popullit. Por sa më mirë mund të kishim qeverisur? Sa ka qenë niveli i pranisë tonë si deputetë?”, tha Rama.
Parlamenti i ri
PD vjen në Parlament me një dhëmballë të prishur. Sa kohë dhëmballa do të jetë aty, fytyra e PD do të jetë e pavotueshme. Ne nuk e kemi pasur as duhet ta kemi luftën me PD. Në fund të këtij mandati ne nuk do të vlerësohemi për çfarë i thamë e çfarë i bëmë PD, por për sa më lart do të ngjisim Shqipërinë. Luftën tonë ne e kemi me problemet e vendit dhe me hallet e shqiptarëve. Me opozitën kemi vetëm betejë politike. Do të bëjmë me një qasje të re.
Vijë të kuqe për korrupsionin
Duhet të jetë e qartë për të gjithë ne se kur dikush që e ka në ballë logon e PS ekspozohet nga drejtësia si përfitues i të mirave publike faji është i tij por turpi është i të gjithëve ne nëse nuk e vendosim qartë vijën e kuqe. Kjo skuadër nuk do jetë kurrë mburoja e askujt që cenon qëllimet e PS. Kjo parti nuk mban përgjegjësi pse një individ shkel në flamurin e saj të vlerave dhe parimeve por mban përgjegjësi sa drejtë reagon duke u distancuar nga akti i tij dhe ai vetë kur hyn drejtësia.
Me qeverinë e Kosovës gjërat nuk shkojnë vaj
Duhet një qasje dhe cilësi e re në marrëdhëniet me Kuvendin e Kosovës, duhet të jemi shumë më të pranishëm në Prishtinë për të diskutuar atje për të ndarë opinione në interes të dy shteteve dhe do i ftojmë shumë më tepër ata.
Me qeverinë e Kosovës gjërat nuk shkojnë vaj dhe mosdakordësia për “Ballkanin e Hapur” ka marrë një peshë të pamerituar në këtë mes, por ne do të punojmë me përkushtim që me qeverinë e Kosovës të kemi marrëdhënie sa më vëllazërore duke u përkushtuar në ato punë dhe drejtime që na bashkojnë dhe duke trajtuar me durim mosdakordësinë për “Ballkanin e Hapur” që është zgjedhje e drejtë për të ardhmen e këtij vendi dhe rajoni ku sa më shumë të hapemi dhe ndërveprojmë aq më shumë do të forcohemi në funksion të perspektivës europiane.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
