“Vjosa”, Rama: Qeveria jonë s’pranon leksione morale se si duhet të sillemi me natyrën

Kryeministri Edi Rama i pranishëm në prezantimin e tre ideve finaliste të Konkursit Ndërkombëtar të Qendrës Multifunksionale dhe Stacioneve të Informimit për Parkun Kombëtar të Vjosës tha se qeveria e tij nuk pranon leksione morale nga europianët.

Ai tha se edhe ata kanë pasur lumenj të egër, por që i kanë ‘zbutur’ rrugës për qëllime të caktuara.

Nuk ka asnjë vend, se bota është e madhe për të folur me siguri, që të ketë një park kombëtar që e përshkon trupin e vendit. Patjetër që duhet ruajtur, por më parë që të na japin leksionet, duhet të kujtohen se të egër kanë qenë lumenjtë e Europës, por ata i kanë zbutur për qëllime që nuk kanë qenë për mbrojtjen e natyrës.

Jemi mirënjohës për nxitjen, inkurajimin, për gjithçka që jemi mundur të mësojmë në një proces që nuk ka qenë i lehtë, deri në transformimin e Vjosës në një park kombëtar. Ne nuk mund të mos e themi që leksionet morale se si duhet të sillemi me natyrën, qeveria jonë nuk i pranon dot!

S’i pranon dot, aq më tepër në një botë ku ndotësit më të mëdhenj, dhe burimet e rrezikut për mjedisin, në kushtet e një përpjekje globale, përballë ndryshimeve klimatike, janë një pjesë e madhe e atyre që bëjnë moralin më insistues.