Nikolla uron Gjeloshajn për fitoren e zgjedhjeve në Tuz: Vullneti i zgjedhësve do t’i shërbejë zhvillimit

Kryetarja e Kuvendit Lindita Nikolla uron fituesit e zgjedhjeve në komunën e Tuzit.

Në urimin e saj, Nikolla përgëzoi “Forumin shqiptar” dhe kryetarin Gjeloshaj për fitoren e 5 marsit.

Përgëzime koalicionit “Forumi shqiptar” dhe kryetarit të komunës së Tuzit, Nik Gjeloshaj, për fitoren në zgjedhjet e 5 marsit. Vullneti i zgjedhësve të Tuzit do t’i shërbejë zhvillimit, mirëqenies, bashkëjetesës paqësore të komuniteteve dhe të drejtave të shqiptarëve në vendin fqinj!.

Kryetari aktual i komunës së Tuzit, Nik Gjeloshaj dhe koalicioni “Forumi Shqiptar” ka arritur të fitojë 18 mandate dhe zyrtarisht fiton të drejtën të qeverisë edhe për katër vitet e ardhshme me komunën e Tuzit.

Në koalicionin “Forumi Shqiptar” të udhëhequr nga Alternativa Shqiptare e kryetarit Nik Gjeloshaj, bëjnë pjesë edhe Lidhja Demokratike e Shqiptarëve, Unioni Kombëtar Shqiptar dhe Lidhja Demokratike në Mal të Zi.