Basha bën bilancin e ngjarjeve të rënda në vend: Rama ka braktisur detyrën

Pas një sër grabitjesh në vend dhe ngjarjeve të tjera të rënda, që kanë zënë gjatë ditëve të fundit hapësirën e kronikës në media, ka ardhur edhe reagimi i kreut të Partisë Demokratike, Lulzim Basha​.

Basha, me anë të një postimi në Facebook, akuzon kreun e ekzekutivit Edi Rama për braktisje të detyrës duke shkruar: “Dy grabitje biznesesh sot në zëmer të vendit, dhe bastisja e një banke në qendër të Tiranës, janë këmbanat e alarmit që bien papushim, e cdo ditë, për pasigurinë totale dhe braktisjen që Edi Rama i ka bërë me kohë detyrës kryesore që është ofrimi i rendit dhe sigurisë”.

Gjithashtu Basha u ndal edhe tek denoncimi i ditës së sotme të selisë blu, ku nga kjo e fundit pretendohet arratisja e një shtetasi turk nga Aeroporti i Rinasit, dhe gjithashtu kreu i opozitës nuk la pa përmendur edhe vdekjen e 17 vjeçarit nga Tropoja në Landfillin e Sharrës.

“Ndërkohë pa kaluar gjatë raportohet një skandal tjetër i rëndë ne Rinas, ku sipas informacioneve është arratisur faqe policisë një shtetas turk të cilit i ishte ndaluar hyrja në territorin tonë. Lajm trondites vrasja e një 17 vjeçari e përdhosja e trupit te tij.” - shkruan Basha në Facebook.

Gjatë postimit të tij Basha nuk la pa përmendur aksidentet e shumta në rrugët e vendit gjatë ditëve të fundit dhe akuzën  “e vjetër” ndaj Ramës për lidhjet me kultivuesit e kanabisit.

Postimi i plotë i kreut të opozitës në Facebook:

Dy grabitje biznesesh sot në zemër te vendit, dhe bastisja e një banke në qendër të Tiranës, janë kambanat e alarmit që bien pa pushim, e çdo ditë, për pasigurinë totale dhe braktisjen që Edi Rama i ka bërë me kohë detyrës kryesore që është ofrimi i rendit dhe sigurisë. Ndërkohë pa kaluar gjatë raportohet një skandal tjetër i rëndë ne Rinas, ku sipas informacioneve është arratisur faqe policisë një shtetas turk të cilit i ishte ndaluar hyrja në territorin tonë. Lajm trondites vrasja e një 17 vjeçari e përdhosja e trupit te tij. Të plagosur rënde nga aksidenti në Librazhd, e një i vdekur në Shkodër nga përplasja me makinë, çka e çon mbi 20 numrin e jetëve të humbura në rrugë për dy javët e fundit. Ky është shpartallim total i çdo standardi sigurie.

Sepse e shpartalluar është qeveria. I dorëhequr de fakto është kryeministri. Ai prej kohësh nuk ka me prioritet qytetarët, por ruajtjen e arave me drogë. Madje ruajtja e parcelave me kanabis dhe vjelja e taksës 30 përqind për çdo rrënjë, është detyra e vetme që i ka lënë kryeqehajait të tij narkoman. Shqiptarët nuk e meritojnë këtë fatkeqësi. Shqipëria meriton rend e siguri.

Dhe ne do tja japim. Krimi do të shtypet. Politikanët e lidhur me të do të kenë të njëjtin fat. ‪#‎Shqiperia më mirë pa Edi Ramën.”