Presidentja e Republikës së Kosovës, Vjosa Osmani dhe kryeministri Albin Kurti kanë pritur në takime ndaras ministrin e Punëve të Jashtme të Kroacisë, Gordan Grlić Radman.
Ministri i Jashtëm i Kroacisë, ka konfirmuar se Kroacia ka siguruar 10 mijë vaksina antiCovid për Kosovën.
“Presidentja Osmani u njoftua se kërkesa e saj më 15 prill 2021 për një donacion simbolik të vaksinave kundër COVID-19 nga Kroacia ka marrë përgjigje pozitive, ndaj sot Ministri Grlić Radman solli lajmin e mirë për donacion prej 10 mijë vaksinash për qytetarët tanë”, thuhet në njoftimin e Presidencës.
Më tej, presidentja Osmani ka theksuar se procesi i dialogut me Serbinë nuk duhet ndërlidhur me liberalizimin e vizave, ngase sipas saj Kosova tashmë ka plotësuar kriteret për liberalizim vizash, pavarësisht se ka pas dyfish kritere më shumë se sa vendet e tjera.
Osmani ka kërkuar mbështetjen kroate në këtë proces dhe ministri Grlić Radman rikonfirmoi mbështetjen e Kroacisë.
“Kosovës duhet t’i jepet liberalizimi i vizave menjëherë, sepse Kosova i ka plotësuar kriteret ndërkaq BE-ja duhet ta mbajë premtimin e jo ta konsiderojë liberalizim si peng të procese të tjera”, ka theksuar Osmani.
Ndërkaq ministri Radman ka potencuar se shteti i tij e ka mbështetur dhe do të vazhdojë ta mbështesë Kosovën në rrugën e saj evropiane, sikurse edhe në procesin e liberalizimit të vizave.
Ministrin e Jashtëm të Kroacisë e ka pritur në takim edhe kryeministri Albin Kurti, me të cilin diskutoi për marrëdhëniet bilaterale në mes të dy vendeve.
Në njoftimin për media të Kryeministrisë thuhet se ministri Radman ia përcolli Kurtit edhe lajmin e kryeministrit kroat, Andrej Plenkoviq, për donacionin prej 10 mijë dozash të vaksinës anti-COVID që Kroacia e ka ndarë për Kosovën.
“Duke spikatur raportet e shkëlqyera ndërmjet dy vendeve, ministri Radman siguroi kryeministrin Kurti se Kroacia do të vazhdojë ta përkrahë dhe ta ndihmojë Republikën e Kosovës në procesin e integrimeve evropiane dhe euroatlantike. Ai kërkoi intensifikimin e marrëdhënieve bilaterale”, thuhet në njoftim.
Kryediplomati kroat ka takuar edhe homologen e tij Donika Gërvalla, pas takimit me të tha se është kundër ndryshimit të kufijve dhe se përkrah dialogun me Serbinë dhe heqjen e vizave.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
